കോവിഡ്​: സൗദിയില്‍ മരണം ആറായിരം കടന്നു

റിയാദ്​: സൗദി അറേബ്യയില്‍ കോവിഡ്​ ബാധിച്ച്‌​ മരിച്ചവരുടെ എണ്ണം ആറായിരം കടന്നു. ആരോഗ്യ വകുപ്പ്​ പുറത്തുവിട്ട ഏറ്റവും പുതിയ റിപ്പോര്‍ട്ട്​ പ്രകാരം ആകെ മരണസംഖ്യ 6002 ആയി.

ബുധനാഴ്​ച 13 പേരാണ്​ മരിച്ചത്. പുതുതായി 159 പേര്‍ക്ക്​ കോവിഡ്​ സ്ഥിരീകരിച്ചു​. രാജ്യത്ത്​ കോവിഡ്​ വ്യാപനമുണ്ടായ ശേഷം ഒമ്ബത്​ മാസത്തിനിടെയുണ്ടായ ഏറ്റവും കുറഞ്ഞ കണക്കാണിത്​. 210 പേര്‍ കോവിഡ്​ മുക്തരായി.

ആകെ കോവിഡ്​ കേസുകളുടെ എണ്ണം 359274 ആയി. രോഗമുക്തരുടെ ആകെ എണ്ണം 349624 ആയി ഉയര്‍ന്നു. രാജ്യത്തെ കോവിഡ്​ മുക്തി നിരക്ക്​ 97.3 ശതമാനമായി. മരണനിരക്ക്​ 1.7 ശതമാനമായി തുടരുന്നു. അസുഖ ബാധിതരായി രാജ്യത്ത്​ ബാക്കിയുള്ളത്​ 3648 പേര്‍ മാത്രമാണ്​.

ഇതില്‍ 550 പേര്‍ മാത്രമാണ്​ ഗുരുതരാവസ്ഥയിലുള്ളത്​. ഇവര്‍ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യനില തൃപ്​തികരമാണ്​.