ബിജെപിയിലും പൊട്ടിത്തെറി, അനുകൂല അന്തരീക്ഷം മുതലാക്കിയില്ല

തദ്ദേശതെരഞ്ഞെടുപ്പിലെ തിരിച്ചടിക്ക് പിന്നാലെ സംസ്ഥാന ബിജെപിയിലും നേതൃത്വത്തിനെതിരെ പരസ്യവിമര്‍ശനം. അനുകൂല രാഷ്ട്രീയ അന്തരീക്ഷം മുതലാക്കാനായില്ലെന്നും തിരുവനന്തപുരം കോര്‍പ്പറേഷനില്‍ സ്ഥാനാര്‍ത്ഥി നിര്‍ണ്ണയം പിഴച്ചെന്നും ഒ.രാജഗോപാല്‍ കുറ്റപ്പെടുത്തി.സുവര്‍ണ്ണാവസരം കളഞ്ഞെന്ന് പി.എം. വേലായുധനും അഭിപ്രായപ്പെട്ടു. ശബരിമല വിവാദം ഉണ്ടാക്കിയ സുവര്‍ണ്ണാവസരം കളഞ്ഞെന്നായിരുന്നു കഴിഞ്ഞ ലോക്‌സഭാ തെരഞ്ഞെടുപ്പില്‍ നേതൃത്വത്തിനെതിരെ പാര്‍ട്ടിയില്‍ നിന്നും ഉയര്‍ന്ന വിമര്‍ശനം. സര്‍ക്കാറും പ്രതിപക്ഷവും ഒരു പോലെ അഴിമതി ആരോപണങ്ങളില്‍ കുടുങ്ങിയ മറ്റൊരു സുവര്‍ണ്ണാവസരം കൂടി നഷ്ടമാക്കിയെന്നാണ് തദ്ദേശഫലത്തെ പാര്‍ട്ടിയിലെ വിമര്‍ശകര്‍ വിലയിരുത്തുന്നത്.
തിരുവനന്തപുരം കോര്‍പ്പറേഷനില്‍ ബിജെപിക്ക് തടയിടാന്‍ ഇടതും വലതും ക്രോസ് വോട്ട് ചെയ്‌തെന്ന് കെ സുരേന്ദ്രന്‍ ആരോപിക്കുമ്പോഴാണ് സ്ഥാനാര്‍ത്ഥി നിര്‍ണ്ണയം പിഴച്ചെന്ന രാജഗോപാലിന്റെ വിമര്‍ശനം. രാജഗോപാലിന് പിന്നാലെ കൂടുതല്‍ നേതാക്കളും സുരേന്ദ്രനെതിരെ രംഗത്തെത്തിശോഭാസുരേന്ദ്രന്റെ പരാതി നേരത്തെ തീര്‍ക്കേണ്ടതായിരുന്നുവെന്നും രാജഗോപാല്‍ പറഞ്ഞു. ശോഭാസുരേന്ദ്രനൊപ്പം പി.എം. വേലായുധനും സുരേന്ദ്രനെതിരെ തെരഞ്ഞെടുപ്പ് കാലത്ത് പരസ്യമായി രംഗത്ത് വന്നിരുന്നു. സംസ്ഥാനപ്രസിഡണ്ടിന് ഏകാധിപത്യനിലപാടാണെനന് വിമര്‍ശനം എതിരാളികള്‍ ഇനി കൂടുതല്‍ ശക്തമാക്കും. സീറ്റെണ്ണം കൂടിയത് നേട്ടമാണെനന് സുരേന്ദ്രന്‍ അവകാശപ്പെടുമ്പോഴാണ് യാാഥാര്‍ത്ഥ്യം അതല്ലെന്ന കുറ്റപ്പെടുത്തല്‍ ഉയരുന്നത്. വിമര്‍ശനങ്ങള്‍ക്കിടയിലും കേന്ദ്രനേതൃത്വം ഫലത്തെ സ്വാഗതം ചെയ്യുന്നത് സുരേന്ദ്രന് ആശ്വാസമാണ്. അതേ സമയം ദേശീയ അധ്യക്ഷന്‍ ജെപി നദ്ദയും കേന്ദ്രമന്ത്രി പ്രകാശ് ജാവ്‌ദേക്കറും കേരളത്തിലെ പാര്‍ട്ടി പ്രകടനം മികച്ചതാണെന്ന് അഭിപ്രായപ്പെട്ടു