കേന്ദ്ര സര്‍ക്കാര്‍ ഫണ്ട് നല്‍കുന്നില്ല; ശ്രീചിത്രയില്‍ കുട്ടികള്‍ക്കുള്ള സൗജന്യചികിത്സയില്ല

തിരുവനന്തപുരം : തിരുവനന്തപുരം ശ്രീചിത്ര ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സില്‍ കേന്ദ്ര സര്‍ക്കാര്‍ ഫണ്ട് നല്‍കാത്തതുമൂലം സൗജന്യ ചികിത്സ നിര്‍ത്തലാക്കി. കുട്ടികള്‍ക്കുള്ള സൗജന്യ ചികിത്സയാണ് നിര്‍ത്തലാക്കിയത്. ഇനിമുതല്‍ ഹൃദ്രോഗമുള്ള ബിപിഎല്‍ വിഭാഗത്തില്‍പ്പെട്ട കുട്ടികള്‍ക്ക് മാത്രമാകും സൗജന്യചികിത്സ. നവംബര്‍ 18മുതലാണ് സൗജന്യചികിത്സ അവസാനിപ്പിച്ചത്.
ബിപിഎല്‍, എപിഎല്‍ വ്യത്യാസമില്ലാതെ എല്ലാ കുട്ടികള്‍ക്കുമുള്ള വിദഗ്ധ ചികിത്സ ഇവിടെ സൗജന്യമായിരുന്നു. സംസ്ഥാനത്തിനകത്തും പുറത്തുനിന്നുമായി നിരവധി പേരാണ് ശ്രീചിത്രയില്‍ ചികിത്സതേടിയിരുന്നത്. ഇതര സംസ്ഥാനങ്ങളില്‍നിന്നുള്ള കുട്ടികള്‍ക്ക് സൗജന്യ ചികിത്സ നല്‍കുന്നത് ശ്രീചിത്ര നേരത്തേ അവസാനിപ്പിച്ചിരുന്നു.കേന്ദ്രസര്‍ക്കാരിന്റെ രാഷ്ട്രീയ ബാല്‍ സ്വാസ്ഥ്യ കാര്യക്രം (ആര്‍ബിഎസ്‌കെ) പ്രകാരം 60 ശതമാനം ഫണ്ടാണ് അനുവദിക്കുന്നത്. സംസ്ഥാന സര്‍ക്കാര്‍ മുഖേനയാണ് ശ്രീചിത്രയ്ക്ക് ഇത് നല്‍കിയിരുന്നത്. കാലങ്ങളായി കേന്ദ്ര സര്‍ക്കാര്‍ ഈ ഫണ്ട് നല്‍കുന്നില്ല. ഇതോടെയാണ് സൗജന്യചികിത്സ അവസാനിപ്പിച്ചത്.