കോട്ടയം നല്‍കി കുതിപ്പിന്റെ വഴികള്‍

മാറുന്ന കേരളത്തിനൊപ്പം കുതിക്കാന്‍ കോട്ടയത്തിന്റെ സമഗ്രവികസനം ലക്ഷ്യമിടുന്ന വികസന പദ്ധതികള്‍ കോട്ടയം ജില്ല മുഖ്യമന്ത്രിക്ക് സമര്‍പ്പിച്ചു.
ആരോഗ്യം, വിദ്യാഭ്യാസം, കൃഷി വ്യവസായം തുടങ്ങിയ മേഖലകളില്‍ കോട്ടയം ജില്ലയുടെ സാധ്യതകള്‍ എങ്ങനെ വിനയോഗിക്കാം എന്നതിനുള്ള വിശദമായ നിര്‍ദേശങ്ങളാണ് ഒരോമേഖലയില്‍ നിന്നുള്ള മേഖലയില്‍ നിന്നുള്ള വിദഗ്ധര്‍ സമര്‍പ്പിച്ചത്.

പുതുകേരള സൃഷ്ടിക്കായുള്ള മുന്നേറ്റത്തില്‍ ജില്ലയുടെ വികസന ആവശ്യങ്ങളും പ്രശ്നങ്ങളും പരിഹാര നിര്‍ദേശങ്ങളുമെല്ലാം വിവിധ തലങ്ങളില്‍നിന്ന് തെരഞ്ഞെടുക്കപ്പെട്ട വിദഗ്ധരും പൗരമുഖ്യരുമായിട്ടാണ് മുഖ്യമന്ത്രി ആശയവിനിമയം നടത്തിയത്. അവരുടെ ആവശ്യങ്ങള്‍ അടങ്ങിയ നിവേദനങ്ങളും വാങ്ങി. കാലാനുസൃതമായി നാടിന്റെ വികസനവേഗം കൂട്ടാനും ഫലപ്രദമാക്കാനുമുള്ള അതിനൂതനങ്ങളായ ആശയങ്ങളും അഭിപ്രായങ്ങളും മുഖ്യമന്ത്രി സ്വീകരിച്ചു. പ്രത്യേകിച്ച് കോട്ടയത്തെ വികസന നയങ്ങളെക്കുറിച്ചും ചര്‍ച്ചചെയ്തു. എംജി യൂണിവേഴ്സിറ്റി വൈസ് ചാന്‍സലര്‍ ഡോ. സാബു തോമസ്, പരിസ്ഥിതി വിദഗ്ധന്‍ ഡോ. ജയചന്ദ്രന്‍, മെഡിക്കല്‍ കോളേജ് സൂപ്രണ്ട് ഡോ. ടി കെ ജയകുമാര്‍, ആരോഗ്യമേഖലയിലെ വിദഗ്ധന്‍ ഡോ. പി ജി ആര്‍ പിള്ള, , ഇന്ത്യന്‍ റബര്‍ ഡീലേഴ്സ് ഫെഡ. പ്രസിഡന്റ് ജോര്‍ജ് വാലി, ദുരന്തനിവാരണം സംബന്ധിച്ച് സുനു സാറാ ജോണ്‍, ബസ് ഓപ്പറേറ്റേഴ്സ് ഫെഡ. പ്രസിഡന്റ് വി വി ചാക്കോ, സിവിഎച്ച്ആര്‍ ജനറല്‍ സെക്രട്ടറി അരുണ്‍കുമാര്‍, കോട്ടയം പോര്‍ട്ട് എംഡി എബ്രഹാം വര്‍ഗീസ്, ജില്ലാ പഞ്ചായത്തംഗം നിര്‍മല ജിമ്മി, എന്നിവര്‍ക്കുപുറമെ സാങ്കേതിക വിദഗ്ധര്‍, ചെറുകിട വ്യവസായ മേഖലയിലെ പ്രതിനിധികള്‍, കലാ--സാംസ്‌കാരിക മേഖലയിലെ പ്രമുഖര്‍ എന്നിവരും നിര്‍ദേശങ്ങള്‍ സമര്‍പ്പിച്ചു.

അവതരിപ്പിച്ച വിലപ്പെട്ട നിര്‍ദേശങ്ങള്‍ നടപ്പാക്കുകയാണ് സര്‍ക്കാര്‍ ലക്ഷ്യമെന്ന് മറുപടിയായി മുഖ്യമന്ത്രി പറഞ്ഞു. വെറുംവാക്കും വാഗ്ദാനവുമല്ല വികസനം, ഫലപ്രദമായ കാഴ്ചപ്പാടും ഇടപെടലുകളും അനിവാര്യമാണെന്ന നേര്‍ക്കാഴ്ച്ചയുടെ പശ്ചാത്തലത്തില്‍ കൂടിയാണ് പര്യടനം. നാടിനെ കൈകോര്‍ത്തുപിടിച്ചുള്ള പ്രയാണം തുടരുമെന്ന് മുഖ്യമന്ത്രി പിണറായി വിജയന്‍ ഉറപ്പുനല്‍കി. നാട്ടകം മണിപ്പുഴയിലെ പാംഗ്രൂം ഓഡിറ്റോറിയത്തില്‍ വൈകിട്ട് നാലിന് പരിപാടിക്ക് തുടക്കംകുറിച്ചു. സിപിഐ എം ജില്ലാ സെക്രട്ടറി വി എന്‍ വാസവന്‍ ചര്‍ച്ചകള്‍ക്കുള്ള കോ--ഓഡിനേറ്ററായി പ്രവര്‍ത്തിച്ചു.സിപിഐ എം കേന്ദ്രകമ്മിറ്റിയംഗം വൈക്കം വിശ്വന്‍ അധ്യക്ഷനായി.എംപിമാരായ ജോസ് കെ മാണി, തോമസ് ചാഴികാടന്‍, എംഎല്‍എമാരായ സുരേഷ്‌കുറുപ്പ്, മാണി സി കാപ്പന്‍, സി കെ ആശ, സിപിഐ എം സംസ്ഥാന സെക്രട്ടറിയറ്റംഗം കെ ജെ തോമസ്, സിപിഐ സംസ്ഥാന അസി. സെക്രട്ടറി അഡ്വ. പ്രകാശ്ബാബു, ജില്ലാ സെക്രട്ടറി സി കെ ശശിധരന്‍ തുടങ്ങിയവര്‍ പരിപാടിയില്‍ പങ്കെടുത്തു.