കണ്ണൂരില്‍ മുതിര്‍ന്ന നേതാക്കളെ കയ്യേറ്റം ചെയ്ത് യൂത്ത് ലീഗ് പ്രവര്‍ത്തകര്‍

കണ്ണൂരിലെ മുസ്ലീം ലീഗില്‍ പൊട്ടിത്തെറി. കോര്‍പ്പറേഷന്‍ വൈസ് ചെയര്‍പേഴ്‌സണ്‍ സ്ഥാനത്തെ ചൊല്ലിയാണ് തര്‍ക്കം. യൂത്ത് ലീഗ് പ്രവര്‍ത്തകര്‍ മുതിര്‍ന്ന നേതാക്കളെ കയ്യേറ്റം ചെയ്തു. ലീഗ് സംസ്ഥാന വൈസ് പ്രസിഡന്റ് അബ്ദുള്‍ ഖാദര്‍ മൗലവി, ജില്ലാ സെക്രട്ടറി അബ്ദുള്‍ കരീം ചേലേരി എന്നിവരെ യൂത്ത് ലീഗ് പ്രവര്‍ത്തകര്‍ തടഞ്ഞുവച്ചിരിക്കുകയാണ്.
യുഡിഎഫിന് ഭൂരിപക്ഷമുള്ള സംസ്ഥാനത്തെ ഏക കോര്‍പ്പറേഷനാണ് കണ്ണൂര്‍. കോര്‍പ്പറേഷന്‍ മേയര്‍ സ്ഥാനത്തെ ചൊല്ലിയുള്ള കോണ്‍ഗ്രസിലെ പോരിന് ഒരുവിധം അവസാനമാകുകയും ടി ഒ മോഹനനെ മേയര്‍ ആക്കാന്‍ കോണ്‍ഗ്രസ് കൗണ്‍സിലര്‍മാരുടെ വോട്ടെടുപ്പിലൂടെ തീരുമാനമാകുകയും ചെയ്തത് ഇന്നലെയാണ്. അതിനിടെയാണ് വൈസ് ചെയര്‍മാന്‍ സ്ഥാനത്തെ ചൊല്ലി ലീഗിനകത്തെ പൊട്ടിത്തെറി.
കസാനക്കോട്ട ഡിവിഷനില്‍നിന്നു ജയിച്ച ഷമീമ ടീച്ചര്‍ക്കുവേണ്ടി ഒരു വിഭാഗവും, ആയിക്കര ഡിവിഷനില്‍നിന്നു ജയിച്ച കെ എം സാബിറ ടീച്ചര്‍ക്ക് വേണ്ടി മറ്റൊരു വിഭാഗവും താണയില്‍നിന്നു ജയിച്ച കെ ഷബീന ടീച്ചര്‍ക്കു വേണ്ടി വേറൊരു വിഭാഗവും രംഗത്തുവന്നതോടെയാണ് തര്‍ക്കം ഉടലെടുത്തത്. ഇന്നലെ രാവിലെ 10 മണി മുതല്‍ ആരംഭിച്ച വൈസ് ചെയര്‍പേഴ്‌സണെ തെരഞ്ഞെടുക്കാനുള്ള ചര്‍ച്ച രാത്രി വൈകിയും സമവായത്തിലെത്തിയിരുന്നില്ല.