വരുന്നത് ഗലോട്ട് കേരളത്തില്‍ ഇത്തവണ ആന്റണിയുടെ കളി

സച്ചിന്‍ പൈലറ്റിനെ ഒതുക്കി മൂലയ്ക്കിരുത്തിയ അശോക ഗലോട്ടിനെ കേരളത്തിലേക്ക് എത്തിച്ച് എ കെ ആന്റണി തന്റെ നീക്കങ്ങള്‍ ശക്തമാക്കി. ദേശീയ രാഷ്ട്രീയത്തില്‍ മുതിര്‍ന്ന നേതാക്കള്‍ക്ക് പ്രാമുഖ്യം വേണം എന്ന് വാദിക്കുന്ന നേതാവാണ് ഗലോട്ട്.
അതിനേക്കാള്‍ ഉപരി രാഹുല്‍ ഗാന്ധിക്ക് കീഴ്‌പ്പെട്ട് നില്‍ക്കുന്നയാളല്ല ഗലോട്ട് എന്നുള്ളതാണ്. യുവ നേതാക്കള്‍ക്ക് കൂടുതല്‍ പ്രാമുഖ്യം നല്‍കാനുള്ള രാഹുല്‍ നീക്കത്തിനിടയിലാണ് കേരള ചുമതലയിലേക്ക് അശോക് ഗലോട്ട് എത്തുന്നത്.
രാജസ്ഥാനില്‍ നടന്ന പോര്‍ വിളിയില്‍ രാഹുല്‍ ഗാന്ധിയും പ്രിയങ്കയും സച്ചിന്‍ പൈലറ്റിനൊപ്പം നിന്നിട്ടും ഗലോട്ടിനെ ഒതുക്കാന്‍ സാധിച്ചില്ല. അന്ന് ഒടുവില്‍ സോണിയയും ആന്റണിയുമായി ചര്‍ച്ച നടത്തിയാണ് പ്രശ്‌നങ്ങള്‍ പരിഹരിച്ചത്.
കേന്ദ്രനേതൃത്വം ഗലോട്ടിനൊപ്പമാണന്ന സൂചന രാജസ്ഥാനില്‍ നല്‍കി സഹായിച്ചത് എ കെ ആന്റണിയാണ്. അവിടേക്കാണ് ആന്റണിയുടെ വിശ്വസ്ഥനായി ഇപ്പോള്‍ മാറിയിരിക്കുന്ന കെ സി വേണുഗോപാലിനൊപ്പം ഗലോട്ട് എത്തുന്നത്.
പക്ഷെ യൂത്ത് കോണ്‍ഗ്രസിനും , രാഹുല്‍ വിശ്വസ്ഥര്‍ക്കും അത്ര നല്ലതല്ല ഈ വരവ്. കെ സി വേണുഗോപാലിനുവേണ്ടി നില്‍ക്കുന്ന കര്‍ണ്ണാടക , ഗോവാ നേതാക്കളും കേരള ചുമതലയിലുണ്ട്.
അശോക് ഗെലോട്ടിന്റെ നേതൃത്വത്തിലുള്ള മൂന്നംഗ സമിതിയില്‍ കര്‍ണാടക മുന്‍ ഉപമുഖ്യമന്ത്രി ജി. പരമേശ്വര, ഗോവ മുന്‍ മുഖ്യമന്ത്രി ലൂസീഞ്ഞോ ഫലെയ്‌റോ എന്നിവരാണു മറ്റംഗങ്ങള്‍.

ഇതാദ്യമായാണു മുഖ്യമന്ത്രി പദം വഹിക്കുന്നയാളെ സംസ്ഥാന നിരീക്ഷകനായി പാര്‍ട്ടി നിയോഗിക്കുന്നത്. തിരഞ്ഞെടുപ്പിനെ കോണ്‍ഗ്രസ് ഗൗരവമായി കാണുന്നുവെന്നതിന്റെ തെളിവാണിതെന്നു പാര്‍ട്ടി വൃത്തങ്ങള്‍ 'മനോരമ'യോടു പറഞ്ഞു. തിരഞ്ഞെടുപ്പ് പ്രവര്‍ത്തനങ്ങള്‍ നിരീക്ഷിക്കാനും ഏകോപിപ്പിക്കാനും ഡിസംബറില്‍ 3 എഐസിസി സെക്രട്ടറിമാരെ കേരളത്തിലേക്കു നിയോഗിച്ചതിനു പിന്നാലെയാണ് മുതിര്‍ന്ന നേതാക്കളെയും രംഗത്തിറക്കുന്നത്.