കുമ്മനം നേമത്ത്, കൃഷ്ണദാസ് കാട്ടാക്കടയില്‍

നിയമസഭാ തെരഞ്ഞെടുപ്പില്‍ നേമത്ത് കുമ്മനം രാജശേഖരനും കാട്ടാക്കടയില്‍ പികെ കൃഷ്ണദാസും ബിജെപി സ്ഥാനാര്‍ത്ഥികളായി മത്സരിക്കും. തയ്യാറെടുപ്പുകളുടെ ഭാഗമായി കാട്ടാക്കടയിലെ വാടകവീട്ടിലേക്ക് കൃഷ്ണദാസ് ഇന്ന് മുതല്‍ താമസം മാറും. നേമത്ത് കുമ്മനവും വീടെടുത്തിട്ടുണ്ട്. കെ.സുരേന്ദ്രന്‍ മത്സരിക്കുന്നതില്‍ കേന്ദ്ര നേതൃത്വമായിരിക്കും അന്തിമ തീരുമാനമെടുക്കുക.
ഒരു മുഴം മുമ്പെ കളത്തിലിറങ്ങാനുള്ള പാര്‍ട്ടിനിര്‍ദ്ദേശപ്രകാരമാണ് സ്ഥാനാര്‍ത്ഥിത്വം ഉറപ്പിച്ചവര്‍ താമസം തന്നെ മണ്ഡലത്തിലേക്ക് മാറ്റിയത്. 2016 തെരഞ്ഞടുപ്പിന് ശേഷവും കൃഷ്ണദാസ് കാട്ടക്കടയില്‍ സജീവമായി രംഗത്തുണ്ടായിരുന്നു. സംസ്ഥാനത്ത് ആദ്യമായി താമര വിരിഞ്ഞ നേമത്ത് രാജഗോപാലിന് പകരക്കാരനായാണ് കുമ്മനം രാജശേഖരന്‍ എത്തുന്നത്. കരമനയ്ക്ക് സമീപത്തുള്ള വാടകവീടാണ് കുമ്മനത്തിനായി കണ്ടെത്തിയത്.തദ്ദേശതെരഞ്ഞെടുപ്പിലും ലോക്‌സഭാ തെരഞ്ഞെടുപ്പിലും സംസ്ഥാനത്ത് ബിജെപി വോട്ട് വിഹിതത്തില്‍ മുന്നിലെത്തിയ നേമം ബിജെപി നേതാക്കളെല്ലാം മോഹിക്കുന്ന സീറ്റാണ്. എന്നാല്‍ ആര്‍എസ്എസിന്റെ ശക്തമായ പിന്തുണയുടെ ബലത്തില്‍ ഇവിടെ കുമ്മനം സ്ഥാനാര്‍ത്ഥിത്വം ഉറപ്പിക്കുകയായിരുന്നു.
മറ്റൊരു എ പ്ലസ് മണ്ഡലമായി ബിജെപി വിലയിരുത്തിയ വട്ടിയൂര്‍കാവില്‍ തിരുവനന്തപുരം ജില്ലാ പ്രസിഡന്റ വിവി രാജേഷിനാണ് സാധ്യത. തിരുവനന്തപുരം സെന്‍ട്രലില്‍ സുരേഷ് ഗോപി അല്ലെങ്കില്‍ എസ് സുരേഷ് അല്ലെങ്കില്‍ നടന്‍ കൃഷ്ണകുമാര്‍ എന്നിവരുടെ പേരുകളാണ് പരിഗണിക്കുന്നത്. കഴിഞ്ഞതവണ വി മുരളീധരന്‍ ഇറങ്ങിയ കഴക്കൂട്ടത്ത് സംസ്ഥാന അധ്യക്ഷന്‍ കെ.സുരേന്ദ്രന്റെ പേര് പരിഗണിക്കുന്നു. പക്ഷെ സംസ്ഥാന പ്രസിഡണ്ട് മത്സരിക്കണമോ വേണ്ടയോ എന്നതില്‍ കേന്ദ്ര നേതൃത്വമായിരിക്കും തീരുമാനമെടുക്കുക. കോഴിക്കോട് നോര്‍ത്തില്‍ എംടി രമേശിനും മഞ്ചേശ്വരത്ത് ശ്രീകാന്തിനുമാണ് മുന്‍തൂക്കം. പാലക്കാട്, തൃശ്ശൂര്‍ സീറ്റുകളിലേക്ക് പാര്‍ട്ടി സന്ദീപ് വാര്യരെ പരിഗണിക്കുന്നു .പാര്‍ട്ടിയോട് ഇടഞ്ഞുനില്‍ക്കുന്ന ശോഭാ സുരേന്ദ്രന്റെ പേര് ആദ്യഘട്ടത്തില്‍ ഒരു മണ്ഡലത്തിന്റേയും സാധ്യതാ പട്ടികയില്‍ ഇല്ല. അടുത്തയാഴ്ച ദില്ലിയില്‍ കേന്ദ്ര നേതൃത്വവുമായി ശോഭ ചര്‍ച്ച നടത്തുന്നുണ്ട്. ഈ മാസം അവസാനത്തോടെ ഇരുപതിലേറെ എ പ്ലസ് മണ്ഡലങ്ങളിലെങ്കിലും സ്ഥാനാര്‍ത്ഥിയെ നിശ്ചയിച്ച് കളത്തിലിറങ്ങാനാണ് ബിജെപിയുടെ നീക്കം.