വാളയാറിലെ ആദ്യ പെണ്‍കുട്ടി കൊല്ലപ്പെട്ടിട്ട് ഇന്ന് നാല് വര്‍ഷം

സമൂഹമനസാക്ഷിയെ ഏറെ ഞെട്ടിച്ച വാളയാര്‍ സംഭവത്തിന്റെ മുറിവ് ഇനിയുമുണങ്ങാതെ അട്ടപ്പളളത്തെ മാതാപിതാക്കള്‍. 2017 ജനുവരി 13 നാണ് മൂത്തകുഞ്ഞിനെ ഒറ്റമുറി വീടിനകത്ത് തൂങ്ങിമരിച്ച നിലയില്‍ കണ്ടെത്തിയത്. ദുരൂഹമരണത്തിന്റ 52 ആം നാള്‍ ഇളയകുഞ്ഞിനെയും സമാനരീതിയില്‍ ഈ അച്ഛനുമമ്മയ്ക്കും നഷ്ടമായി. പൊലീസ് അന്വേഷണത്തില്‍ വീഴ്ചവന്നെന്ന ആരോപണം സാധൂകരിക്കും വിധമായിരുന്നു പിന്നീടുളള സംഭവങ്ങള്‍. പ്രതികളായ നാലുപേരെയും തെളിവില്ലെന്ന പേരില്‍ പോക്‌സോ കോടതി വെറുതെവിട്ടു. പിന്നീട് കേരളം കണ്ടത് നീതിക്കായുളള തുടര്‍ സമരങ്ങളായിരുന്നു. ഒടുവില്‍ ഹൈക്കോടതി പുനര്‍വിചാരണയ്ക്ക് ഉത്തരവിട്ടിട്ടും കേസ് അട്ടിമറിക്കാന്‍ കൂട്ടുനിന്ന ഉദ്യോഗസ്ഥര്‍ക്കെതിരെ നടപടിയാവശ്യപ്പെട്ട് കുടുംബം ഇപ്പോഴും സമരമുഖത്താണ്. അട്ടപ്പളളത്ത് ഇന്ന് രാവിലെ 9 മണി മുതല്‍ അഭയ കേസിലെ സാക്ഷി രാജുവും, പൊലീസ് മര്‍ദ്ദനത്തില്‍ ആത്മഹത്യ ചെയ്ത വാളയാറിലെ പ്രവീണിന്റെ അമ്മ എലിസബത്ത് റാണിയും അച്ഛനുമമ്മയ്ക്കുമൊപ്പം ഏകദിന ഉപവാസസത്യഗ്രഹം ഇരിക്കും. പാലക്കാട് എംപി വി കെ ശ്രീകണ്ഠന്‍ സമരം ഉദ്ഘാടനം ചെയ്യും. കേസില്‍ സിബിഐ അന്വേഷണമെന്ന കുടുംബത്തിന്റെ ആവശ്യം നിറവേറ്റിയെന്ന് സര്‍ക്കാര്‍ ആവര്‍ത്തിക്കുമ്പോഴും, ജുഡീഷ്യല്‍ കമ്മീഷനും നടപടിക്ക് ശുപാര്‍ശചെയ്ത അന്വേഷണ ഉദ്യോഗസ്ഥര്‍ക്കെതിരെ വകുപ്പുതല നടപടി വൈകുകയാണ്.