വിവാദങ്ങള്‍ ഒഴിവാക്കാന്‍ യുവജനപ്രതിനിധികള്‍ക്ക് സിപിഎം പഠനക്ലാസ്

യുവജനങ്ങളെ ഇറക്കിയായിരുന്നു തദ്ദേശ തെരഞ്ഞെടുപ്പ് സ്ഥാപനങ്ങളിലേക്കുള്ള സിപിഐഎമ്മിന്റെ തെരഞ്ഞെടുപ്പ് പരീക്ഷണം. അതില്‍ ഒരു പരിധി വരെ വിജയിക്കുകയും ചെയ്തു. ഇത്തരത്തില്‍ തെരഞ്ഞെടുക്കപ്പെട്ട ജനപ്രതിനിധികള്‍ക്ക് പരിശീലനക്ലാസ് സംഘടിപ്പിക്കാനാണ് സിപിഐഎമ്മിന്റെ അടുത്ത ചുവട്.
21 വയസ് മുതല്‍ അങ്ങോട്ട് വലിയ യുവനിരയാണ് സിപിഐഎമ്മില്‍ നിന്നും ജനപ്രതിനിധിയായി തെരഞ്ഞെടുക്കപ്പെട്ടത്. ഇതില്‍ മേയര്‍ വരെ ഉള്‍പ്പെടും. എന്നാല്‍ ഇവര്‍ക്ക് വേണ്ടത്ര പരിശീലനം നല്‍കിയില്ലെങ്കില്‍ അനാവശ്യവിവാദങ്ങളില്‍ ചെന്നുപെടാനുള്ള സാധ്യത തിരിച്ചറിഞ്ഞാണ് പരിശീലനം നല്‍കുന്നത്.
കോര്‍പ്പറേഷന്‍, നഗരസഭ, ജില്ലാ പഞ്ചായത്ത് അധ്യക്ഷര്‍ക്കുള്ള ക്ലാസാണ് സംസ്ഥാന സെക്രട്ടറിയേറ്റ് അംഗങ്ങള്‍ പങ്കെടുത്ത് ജില്ലകളില്‍ സംഘടിപ്പിക്കുന്നത്. ഒരു പദവിയില്‍ തുടരുമ്പോള്‍ ഉയര്‍ന്നുവരുന്ന രാഷ്ടീയ സംഘടനാ വിഷയങ്ങള്‍ എങ്ങനെ കൈകാര്യം ചെയ്യണം, ഭരണപരമായ കാര്യങ്ങളില്‍ തീരുമാനം എടുക്കുന്നതിന് മുമ്പ് പരിശോധിക്കേണ്ട കാര്യങ്ങള്‍ എന്തെല്ലം, പെരുമാറ്റച്ചട്ടം എന്നിവയില്‍ ഊന്നിയാവും ക്ലാസ്.
തദ്ദേശ സ്ഥാപന പ്രതിനിധികള്‍ ഉള്‍പ്പെടെ മറ്റുള്ളവര്‍ക്ക് ഏരിയാ കമ്മിറ്റി തലത്തില്‍ ജില്ലാ സെക്രട്ടറിയേറ്റ് അംഗങ്ങള്‍ പങ്കെടുത്തായിരിക്കും ക്ലാസ്. നിയമസഭാ തെരഞ്ഞെടുപ്പ് തെരഞ്ഞെടുപ്പില്‍ സര്‍ക്കാരിന്റെ മുന്‍ഗണന പദ്ധതികള്‍ നടപ്പിലാക്കുന്നത് ഭൂരിഭാഗവും തദ്ദേശ തെരഞ്ഞെടുപ്പ് വഴിയാണ്. ഒപ്പം പ്രാദേശിയ തലത്തിലെ പ്രചാരണം നിയമസഭാ തെരഞ്ഞെടുപ്പില്‍ ഏറെ നിര്‍ണായകമാണ്. ഇത് കൂടി കണക്കിലെടുത്താണ് പാര്‍ട്ടി നീക്കം.