കോതമംഗലം പള്ളി കേന്ദ്രസേനയെ ഉപയോഗിച്ച് ഏറ്റെടുക്കണമെന്ന ഉത്തരവ് നടപ്പാക്കുന്നത് നീട്ടി

കോതമംഗലം പള്ളി കേന്ദ്ര സേനയെ ഉപയോഗിച്ച് ഏറ്റെടുക്കണമെന്ന ഹൈക്കോടതി സിംഗിള്‍ ബഞ്ച് ഉത്തരവ് നടപ്പാക്കുന്നത് ഡിവിഷന്‍ ബഞ്ച് രണ്ടാഴ്ചകൂടി നീട്ടി. സംസ്ഥാന സര്‍ക്കാര്‍ നല്‍കിയ അപ്പീല്‍ വീണ്ടും പരിഗണിക്കുന്നത് വരെയാണ് ഉത്തരവ് നടപ്പാക്കുന്നത് നീട്ടിയത്. സിംഗിള്‍ ബഞ്ച് ഉത്തരവിനെതിരെ പുന:പരിശോധന ഹര്‍ജി നല്‍കുമെന്ന് കേന്ദ്ര സര്‍ക്കാരും കോടതിയെ അറയിച്ചു. അതേസമയം എന്ത് ഭീഷണിയുണ്ടായാലും കേസ് പരിഗണിക്കുന്നതില്‍ നിന്ന് പിന്‍മാറില്ലെന്ന് ജസ്റ്റിസുമാരായ അലക്‌സാണ്ടര്‍ തോമസ്, ടി.ആര്‍ രവി എന്നിവരടങ്ങിയ ബഞ്ച് വ്യക്തമാക്കി. ഇതിനായി ഇരു വിഭാഗങ്ങളിലെ അഭിഭാഷകരുടെയും അഡീഷണല്‍ സോളിസിറ്ററുടെയും പൂര്‍ണ്ണ സഹകരണം ആവശ്യമാണെന്നും കോടതി അറയിച്ചു.
കോതമംഗലം മാര്‍ തോമ്മന്‍ ചെറിയപള്ളി ജനുവരി എട്ടാം തിയ്യതിക്കകം സര്‍ക്കാര്‍ ഏറ്റെടുക്കണമെന്നായിരുന്നു കേരള ഹൈക്കോടതി സിംഗിള്‍ ബെഞ്ച് ഉത്തരവ്. ഇത് നടപ്പാക്കുന്നത് നിര്‍ത്തിവെക്കാന്‍ ഡിവിഷന്‍ ബെഞ്ച് നേരത്തെ നിര്‍ദ്ദേശം നല്‍കിയിരുന്നു. സര്‍ക്കാര്‍ പള്ളി ഏറ്റെടുത്തില്ലെങ്കില്‍ സിആര്‍പിഎഫ് ഏറ്റെടുക്കണമെന്നായിരുന്നു സിംഗിള്‍ ബെഞ്ചിന്റെ ഉത്തരവ്. കോടതിയലക്ഷ്യ കേസില്‍ മറ്റ് നിര്‍ദ്ദേശങ്ങള്‍ പാസാക്കാന്‍ സിംഗിള്‍ ബെഞ്ചിന് കഴിയുമോ എന്ന് പരിശോധിക്കേണ്ടതുണ്ടെന്ന് വ്യക്തമാക്കിയ കോടതി, ഇന്ന് കേസ് പരിഗണിക്കാമെന്നാണ് അന്ന് അറിയിച്ചിരുന്നത്.കോതമംഗലം പള്ളി ഏറ്റെടുത്ത് ഓര്‍ത്ത്‌ഡോക്‌സ് വിഭാഗത്തിന് കൈമാറാത്തതിനെ ഹൈക്കോടതി നിശിതമായി വിമര്‍ശിച്ചതിനു പിന്നാലെ യാക്കോബായ സഭ സമരം ശക്തമാക്കിയിരിക്കുകയാണ്. ഒരു മാസത്തിലധികമായി വിവിധ തരത്തിലുളള സമരങ്ങളാണ് സഭ നടത്തുന്നത്.