മുസ്‌ളീം ലീഗ് പണി തുടങ്ങി

കേരള യാത്രയില്‍ നിന്ന് എം.കെ. മുനീറിനെ ഒഴിവാക്കിയതായി ആരോപണം

പ്രതിപക്ഷ നേതാവ് രമേശ് ചെന്നിത്തലയുടെ കേരള യാത്രയില്‍ നിന്ന് പ്രതിപക്ഷ ഉപ നേതാവ് എം.കെ മുനീറിനിനെ ഒഴിവാക്കിയതായി ആരോപണം. കേരളയാത്രയുമായി ബന്ധപ്പെട്ട പോസ്റ്ററില്‍ മുനീറിന്റെ പേരും ചിത്രവും ഉള്‍പ്പെടുത്താത്തതാണ് വിവാദമായത്. പോസ്റ്ററില്‍ ലീഗ് സംസ്ഥാന പ്രസിഡന്റ് ഹൈദരലി തങ്ങള്‍ക്ക് അര്‍ഹിച്ച പ്രധാന്യം ലഭിച്ചില്ലെന്നും ആക്ഷേപമുണ്ട്. ഇതിനെതിരെ പരസ്യവിമര്‍ശനവുമായി യൂത്ത് ലീഗ് സംസ്ഥാന പ്രസിഡന്റ് ആഷിഖ് ചെലവൂര്‍ രംഗത്തെത്തി.

ജനുവരി 31ന് തുടങ്ങുന്ന ചെന്നിത്തലയുടെ യാത്രയുടെ ഫേസ്ബുക്ക് പോസ്റ്ററിലാണ് എം.കെ മുനീറിന്റെ ചിത്രമില്ലാത്തത്. ഹൈദരലി തങ്ങളുടെ ചിത്രം കുഞ്ഞാലിക്കുട്ടിക്കും മുല്ലപ്പള്ളി രാമചന്ദ്രനും മറ്റു നേതാക്കള്‍ക്കുമൊപ്പം ഒരേ വലിപ്പത്തിലാണ് ചേര്‍ത്തിരിക്കുന്നത്. ഹൈദരലി ശിഹാബ് തങ്ങളുടെ ചിത്രം വയ്‌ക്കേണ്ട സ്ഥാനത്തല്ല വച്ചതെന്നാണ് ആക്ഷേപം.

ആഷിക് ചെലവൂരിന്റെ ഫേസ്ബുക്ക് പോസ്റ്റ്

ജനുവരി മുപ്പത്തി ഒന്ന് മുതല്‍ ആരംഭിക്കാനിരിക്കുന്ന യു.ഡി.എഫ് ഐശ്വര്യ കേരള യാത്രയില്‍ പ്രതിപക്ഷ നേതാവ് രമേശ് ചെന്നിത്തലയാണ് ക്യാപ്റ്റന്‍, സ്വഭാവികമായും പ്രതിപക്ഷ ഉപനേതാവുംമുസ്ലിം ലീഗ് നിയമസഭാ പാര്‍ട്ടി ലീഡര്‍ ആയ ഡോ.എം.കെ. മുനീറിനെയും ജാഥയുടെ ഉപനായകന്‍ ആക്കിയില്ലെങ്കിലും ആ ജാഥയുടെ കോ-ഒര്‍ഡിനേറ്റര്‍ മാരിലെങ്കിലും ഉള്‍പ്പെടുത്തേണ്ടതല്ലേ.-. ജാഥയുടെ പോസ്റ്റര്‍ ഡിസൈന്‍ ഇപ്പോള്‍ പ്രതിപക്ഷ നേതാവ് തന്നെ പുറത്തിറക്കിയിട്ടുണ്ട്. സാധാരണ ഗതിയില്‍ ബഹുമാന്യരായ സയ്യിദ് ഹൈദരലി ശിഹാബ് തങ്ങളുടെ ചിത്രം വെക്കേണ്ട സ്ഥാനത്തല്ല വെച്ചത്… കോണ്‍ഗ്രസ് പാര്‍ട്ടിയുടെ സമുന്നത നേതാക്കളുടെ എല്ലാവരുടെയും പേരുകള്‍ ഉള്‍പ്പെടുത്താവുന്നതാണ്. കൂട്ടത്തില്‍ മുസ്ലിം ലീഗില്‍ നിന്ന് കഴിഞ്ഞ നാലരവര്‍ഷക്കാലം പ്രതി പക്ഷ നിരയില്‍ ശക്തമായ സാന്നിധ്യവും പോരാട്ടവും നടത്തിയ മുനിര്‍ സാഹിബിനെ ഉള്‍ക്കൊള്ളിക്കാതിരിക്കുന്നത് അനീതിയല്ലേ…. അത് ഉള്‍ക്കൊള്ളിക്കാന്‍ യു.ഡി.എഫ് നേതൃത്വം തയ്യാറാവണം…