20 സീറ്റ് ലക്ഷ്യമിട്ട് ബിജെപി

പിണറായിക്ക് തുടർഭരണ സാധ്യതയെന്ന് വിലയിരുത്തൽ

കേരളത്തിൽ ഒറ്റയ്ക്ക് കരുത്ത് കാണിച്ച് മുന്നേറാൻ ബിജെപി തീരുമാനം. തിരഞ്ഞെടുപ്പിന് മുന്നോടിയായി പാർട്ടി ദേശീയ നേതൃത്വം ജനുവരി ആദ്യം കൊണ്ട് പൂർത്തീകരിച്ച സർവേയിൽ കേരളത്തിൽ തുടർഭരണ സാധ്യതയാണ് കാണിക്കുന്നത്.
അതിനാൽ ഏറ്റവും മികച്ച മുന്നേറ്റം നടത്തി സഭയിൽ എത്തുക എന്നതാണ് നിലവിലെ സംസ്ഥാന നേതൃത്വത്തിന് നൽകിയിരിക്കുന്ന നിർദേശം.
പഞ്ചായത്ത് തിരഞ്ഞെടുപ്പിലെ വിലയിരുത്തലിൽ 45 സീറ്റിൽ ശക്തമായ ത്രികോണ മത്‌സരം നടത്താൻ തങ്ങൾക്കാവും എന്നാണ് ബിജെപി വിലയിരുത്തൽ.

കോൺഗ്രസ് മുക്ത കേരളം എന്ന സ്വപ്നം സാധ്യമാക്കാൻ സർവ സന്നാഹങ്ങളുമായി ബി ജെ പി. ഇതിനായുളള നീക്കങ്ങൾ നടത്താനും സാധ്യതയുണ്ട്. സംസ്ഥാനമൊട്ടാകെ നടക്കുന്ന പഠന ശിബിരങ്ങളിൽ ഇതുസംബന്ധിച്ച വ്യക്തമായ നിർദ്ദേശമാണ് പാർട്ടി പ്രവർത്തകർക്ക് നൽകുന്നത്.

2026ലെ നിയമസഭാ തിരഞ്ഞെടുപ്പിൽ എൽ ഡി എഫ്- എൻ ഡി എ മത്സരമെന്ന രീതിയിലായിരിക്കണം ഇത്തവണത്തെ തിരഞ്ഞെടുപ്പ് പ്രവർത്തനങ്ങളെന്നാണ് ബി ജെ പി നിർദ്ദേശം. യു ഡി എഫ് അധികാരത്തിൽ വരുന്നതിനെക്കാൾ സംസ്ഥാനത്ത് തുടർഭരണം വരുന്നതാണ് നല്ലതെന്നാണ് ബി ജെ പി കണക്കുകൂട്ടുന്നത്. യു ഡി എഫ് തോറ്റാൽ കോൺഗ്രസിൽനിന്നും ചില ഘടകകക്ഷികളിൽനിന്നും വൻതോതിൽ ബി ജെ പി യിലേക്ക് നേതാക്കളുടേയും പ്രവർത്തകരുടേയും ഒഴുക്കുണ്ടാകുമെന്നാണ് ബി ജെ പി കരുതുന്നത്.

ഒരു തവണ കൂടി ഭരണം നഷ്ടപ്പെട്ടാൽ ഭൂരിപക്ഷം പേരും തുടരില്ലെന്ന വിലയിരുത്തലിലാണ് ബി ജെ പി. മറ്റ് പല സംസ്ഥാനങ്ങളിലും ബി ജെ പിയെ ശക്തിപ്പെടുത്തിയതും ഇതേ തന്ത്രമാണ്. കർണാടക, ത്രിപുര, ബംഗാൾ തുടങ്ങിയ സംസ്ഥാനങ്ങളിൽ കോൺഗ്രസിനെ ക്ഷീണിപ്പിച്ചതാണ് നേട്ടമുണ്ടാകാൻ കാരണം .
കോൺഗ്രസും സി പി എമ്മും ഒരുപോലെ എതിർക്കേണ്ടവർ എന്നായിരുന്നു കേരളത്തിലെ ശൈലി അതിൽ നിന്ന് മാറിയേക്കും. തദ്ദേശ തിരഞ്ഞെടുപ്പിൽ 31 ലക്ഷം വോട്ടുകൾ കിട്ടിയെന്നാണ് ബിജെപി കണക്ക്. എൽ ഡി എഫിനും യു ഡി എഫിനും 50 ലക്ഷത്തിനും 60 ലക്ഷത്തിനും ഇടയിൽ വോട്ടുകളാണ് കിട്ടിയത്. കോൺഗ്രസിനെ ക്ഷീണിപ്പിച്ചാൽ ബി ജെ പിക്ക് 50 ലക്ഷം വോട്ടിലേക്ക് 2026ലെ നിയമസഭാ തിരഞ്ഞെടുപ്പിൽ എത്താൻ പ്രയാസമുണ്ടാവില്ല എന്നാണ് ദേശീയ നേതാക്കൾ പറയുന്നത്.