ആലിക്കുട്ടി മുസ്ലിയാരെ വിലക്കിയ സംഭവത്തില്‍ എസ് വൈ എസ് നേതാവിന് സസ്‌പെന്‍ഷന്‍

മുഖ്യമന്ത്രിയുടെ പരിപാടിയില്‍ പങ്കെടുക്കുന്നതില്‍ നിന്നും സമസ്ത ജനറല്‍ സെക്രട്ടറി ആലിക്കുട്ടി മുസ്ലിയാരെ വിലക്കിയ സംഭവത്തില്‍ എസ്വൈ എസ് നേതാവിന് സസ്‌പെന്‍ഷന്‍. എസ്വൈ എസ് കോഴിക്കോട് ജില്ലാ വൈസ് പ്രസിഡന്റ് മലയമ്മ അബൂബക്കര്‍ ഫൈസിയെ ആണ് സമസ്ത സസ്പെന്റ് ചെയ്തത്. സംഘടനാ വിരുദ്ധ പ്രവര്‍ത്തനം ചൂണ്ടിക്കാണിച്ചാണ് നടപടി.സമസ്തയുമായി ബന്ധപ്പെട്ടു ഉയര്‍ന്നു വന്ന വിവാദങ്ങള്‍ അന്വേഷിക്കാന്‍ സമസ്ത മുശാവറ നിയോഗിച്ച സമിതി യോഗമാണ് മലയമ്മ അബൂബക്കര്‍ ഫൈസിക്കെതിരെ നടപടി സ്വീകരിക്കാന്‍ തീരുമാനിച്ചത്. മുഖ്യമന്ത്രിയുടെ കേരള പര്യടനത്തിന്റെ ഭാഗമായി മലപ്പുറത്ത്വച്ച് നിശ്ചയിച്ച കൂടിക്കാഴ്ചയില്‍ നിന്ന് സമസ്ത ജനറല്‍ സെക്രട്ടറി കെ. ആലിക്കുട്ടി മുസ്ലിയാരെ ചിലര്‍ ഇടപെട്ട് തടഞ്ഞന്ന ആരോപണം ഉയര്‍ന്നിരുന്നു. ഈ സംഭവത്തില്‍ അബൂബക്കര്‍ ഫൈസിക്ക് പങ്കുണ്ടെന്നും സംഘടന വിരുദ്ധ പ്രവര്‍ത്തനം നടത്തിയെന്നും കണ്ടതിയോടെയാണ് നടപടി എടുത്തത്.
നടപടി വേണമെന്ന ആവശ്യത്തില്‍ ആലിക്കുട്ടി മുസ്ലിയാര്‍ ഉറച്ചു നിന്നതായാണ് വിവരം. ഇരു വിഭാഗത്തിന്റെയും വിശദമായ വാദം കേട്ടതിനു ശേഷമാണ് അന്വേഷണ സമിതി നടപടി എടുത്തത്.
സമിതി യോഗത്തിലേക്ക് മായീന്‍ ഹാജിയെയും വിളിച്ചു വരുത്തിയിരുന്നു.എന്നാല്‍, മായിന്‍ ഹാജിക്കെതിരെ ഉടന്‍ നടപടി ഉണ്ടാകില്ലെന്നാണ് സൂചന. മായിന്‍ ഹാജിക്കെതിരായ നടപടി സമസ്ത ലീഗ് അണികള്‍ക്കിടയില്‍ ഭിന്നത ഉണ്ടാക്കാനുള്ള സാധ്യത കണക്കിലെടുത്തും വിവാദമുയരാനുള്ള സാഹചര്യം പരിഗണിച്ചുമാണ് നടപടി സമസ്ത വൈകിപ്പിക്കുന്നത്.