പ്രചരണവുമായി സിപിഎം കമ്മിറ്റികൾ തയാർ

ഇടതുമുന്നണിക്ക് തുടർഭരണം മാധ്യമങ്ങളും സർവേ നടത്തിപ്പുകാരും ആവേശപൂർവം പറയുമ്പോഴും അതിനൊന്നും ചെവികൊടുക്കാതെ ശക്തമായ പ്രചരണപരിപാടികളിലേക്ക് നീങ്ങിയിരിക്കുകയാണ് സി പി എം.

പഞ്ചായത്ത് തിരഞ്ഞെടുപ്പിന് വീഴ്ച്ച പറ്റിയ ഇടങ്ങളിൽ തെറ്റു തിരുത്തി പ്രചരണം തുടങ്ങിക്കഴിഞ്ഞു. കേരളത്തിലാകെ നിയോജകമണ്ഡലം തലത്തിൽ തിരഞ്ഞെടുപ്പ് കമ്മിറ്റികൾ രൂപീകരിച്ചു കഴിഞ്ഞു. ആ നിയോജക മണ്ഡലവുമായി ബന്ധപ്പെട്ട ഏരിയ കമ്മിറ്റിയും ജില്ലാ കമ്മിറ്റി അംഗങ്ങളും ലോക്കൽ സെക്രട്ടറിമാരും ചേർന്നതാണ് ഈ സമിതി. പഞ്ചായത്ത്, ബൂത്ത് തല കമ്മിറ്റികൾ 31ന് മുൻപു രൂപീകരിക്കും.

സി ഐറ്റി യു വിന്റെ വാഹന ജാഥയുടെ പേരിൽ പാർട്ടി അണികൾ വീണ്ടും സജീവമായിക്കഴിഞ്ഞു. ഇതി കർഷക സമരം കൂടി എത്തുന്നതോടെ തിരഞ്ഞെടുപ്പ് നടപടികളിലേക്ക് പതിയെ കാര്യങ്ങൾ നീങ്ങും.
പാർട്ടിയുടെ സീറ്റിൽ പകുതിയോളം പുതുമുഖങ്ങൾക്കും യുവാക്കൾക്കുമായിരിക്കും സാധ്യത. ജനങ്ങൾക്ക് മുന്നിൽ പുതിയ നേതൃത്വത്തെ അവതരിപ്പിക്കാൻ ഇതിലും പറ്റിയ സമയം ഇല്ലെന്നാണ് വിലയിരുത്തൽ.
തുടർച്ചയായി 2 ടേം നിന്നവരെ ഒഴിവാക്കണം എന്നതാണു സ്ഥാനാർഥിത്വം സംബന്ധിച്ച സിപിഎം നിബന്ധന. ഇതിൽ കൂടുതൽ ഉറച്ചു നിൽക്കാനാണ് സാധ്യത, അതേസമയം, യാന്ത്രികമായി 2 ടേം നിബന്ധന പാലിക്കില്ല. സ്ത്രീകൾക്കും കൂടുതൽ സീറ്റ് നൽകും. മന്ത്രിമാർ ഉൾപ്പെടെ ഒരുപിടി നേതാക്കൾ ഒഴിവാകും.

ഈ മാസം 28 മുതൽ 31 വരെ പൊളിറ്റ്ബ്യൂറോ, കേന്ദ്രകമ്മിറ്റി യോഗങ്ങൾ നടക്കും. ഫെബ്രുവരി 2 മുതൽ 4 വരെ സംസ്ഥാന സെക്രട്ടേറിയറ്റ്, കമ്മിറ്റി യോഗങ്ങളും ചേരും. സ്ഥാനാർഥിത്വം സംബന്ധിച്ച മാർഗരേഖയും തിരഞ്ഞെടുപ്പ് ഒരുക്കങ്ങളും ഈ യോഗങ്ങൾ ചർച്ച ചെയ്യും.