നേപ്പാള്‍ കമ്മ്യൂണിസ്റ്റ് പാര്‍ട്ടിയില്‍ പിളര്‍പ്പ്; പ്രധാനമന്ത്രി ഒലിയെ പുറത്താക്കി

നേപ്പാള്‍ കമ്മ്യൂണിസ്റ്റ് പാര്‍ട്ടിയില്‍ നിന്ന് പ്രധാനമന്ത്രി കെപി ശര്‍മ്മ ഒലിയെ പുറത്താക്കിയതായി എഎന്‍ഐ റിപ്പോര്‍ട്ട്. പാര്‍ട്ടി ചെയര്‍മാന്‍ പുഷ്പകമാല്‍ ദഹല്‍ വിഭാഗം വക്താവ് നാരായണ്‍ ശ്രേഷ്ഠയാണ് ഇക്കാര്യം അറിയിച്ചതെന്നും പാര്‍ട്ടി പിളര്‍പ്പിലേക്ക് നീങ്ങുകയാണെന്നും എഎന്‍ഐ റിപ്പോര്‍ട്ടില്‍ പറയുന്നു. ഒലിയുടെ പാര്‍ട്ടി മെമ്പര്‍ഷിപ്പ് അസാധുവാക്കിയെന്നാണ് നാരായണ്‍ ശ്രേഷ്ഠ പറഞ്ഞത്.അടുത്തിടെ സര്‍ക്കാരിനെ പിരിച്ചുവിടാന്‍ ഒലി തീരുമാനിച്ചതോടെയാണ് പാര്‍ട്ടിക്കുള്ളില്‍ പ്രതിസന്ധി രൂക്ഷമായത്. ഒലിയുടെ തീരുമാനത്തില്‍ പ്രതിഷേധിച്ച് പാര്‍ട്ടിയിലെ മുന്‍ മാവോയിസ്റ്റ് വിഭാഗത്തിലെ ഏഴു മന്ത്രിമാര്‍ രാജിവച്ചിരുന്നു. ഏപ്രില്‍ 30, മെയ് 10 തീയതികളിലായാണ് നേപ്പാളില്‍ തെരഞ്ഞെടുപ്പ് നടക്കുന്നത്.

2018 മേയ് മാസത്തിലാണ് ഒലിയുടെ നേതൃത്വത്തിലുണ്ടായിരുന്ന സിപിഎന്‍ (യുണൈറ്റഡ് മാര്‍ക്സിസ്റ്റ് ലെനിനിസ്റ്റ്), മുന്‍ പ്രധാനമന്ത്രി പുഷ്പകമല്‍ ദഹല്‍ (പ്രചണ്ഡ) നയിച്ച സിപിഎന്‍ (മാവോയിസ്റ്റ് സെന്റര്‍) എന്നിവ ലയിച്ച് എന്‍സിപി രൂപീകൃതമായത്. ഭൂരിപക്ഷം നേടി അധികാരത്തിലെത്തിയെങ്കിലും ഇരു വിഭാഗങ്ങള്‍ തമ്മില്‍ അഭിപ്രായ ഭിന്നത രൂക്ഷമായിരുന്നു.അതേസമയം, തന്റെ പഴയ പാര്‍ട്ടിയായ കമ്മ്യൂണിസ്റ്റ് പാര്‍ട്ടി ഓഫ് നേപ്പാള്‍ (യുഎംഎല്‍) പുനരുജ്ജീവിപ്പിക്കാന്‍ ഒലി ആലോചിക്കുന്നതായാണ് നേപ്പാള്‍ മാധ്യമങ്ങളിലെ റിപ്പോര്‍ട്ട്.