മലബാറിനെ പേടിച്ച് ഇരിക്കൂറിലേയ്ക്ക് ഇല്ലെന്ന് കെ.സി. ജോസഫ്

ഇരിക്കൂറില്‍ ഇത്തവണ മത്സരിക്കാനില്ലെന്ന് കോണ്‍ഗ്രസ് നേതാവ് കെ.സി ജോസഫ്. മണ്ഡലത്തിലുള്ള പുതുമുഖങ്ങള്‍ക്ക് അവസരം നല്‍കണമെന്ന് നേതൃത്വത്തെ അറിയിച്ചിട്ടുണ്ട്. പാര്‍ട്ടി നിര്‍ദ്ദേശിച്ചാല്‍ മറ്റേതെങ്കിലും സീറ്റില്‍ മത്സരിക്കുമെന്നും കെ.സി ജോസഫ് പറഞ്ഞു. 39 വര്‍ഷങ്ങള്‍ക്ക് ശേഷമാണ് കെ.സി ജോസഫ് ഇരിക്കൂറില്‍ നിന്ന് മാറുന്നത്. മണ്ഡലത്തിനുള്ളിലെ നേതാക്കള്‍ക്ക് അവസരം നല്‍കണം. അവര്‍ക്ക് മുന്നില്‍ തടസമായി നില്‍ക്കാന്‍ താല്‍പര്യമില്ല. ഇരിക്കൂറിലേക്ക് തന്റെ പേര് പരിഗണിക്കരുത് എന്ന് നേതൃത്വത്തെ അറിയിച്ചിട്ടുണ്ടെന്നും കെ.സി ജോസഫ് ട്വന്റി ഫോറിനോട് പറഞ്ഞു. ചങ്ങനാശേരിയില്‍ സ്ഥാനാര്‍ത്ഥിയാകാന്‍ ഇതുവരെ തീരുമാനിച്ചിട്ടില്ല. താന്‍ മത്സരിക്കണോയെന്ന കാര്യം പാര്‍ട്ടിയാണ് തീരുമാനിക്കേണ്ടത്. കൂടുതല്‍ പ്രാതിനിധ്യം വേണമെന്ന യൂത്ത് കോണ്‍ഗ്രസിന്റെ ആവശ്യം ന്യായമാണെന്നും കെസി ജോസഫ് പറഞ്ഞു. മുല്ലപ്പള്ളി രാമചന്ദ്രന്‍ മത്സരിക്കുന്ന കാര്യത്തില്‍ തീരുമാനമെടുക്കേണ്ടത് അദ്ദേഹം തന്നെയാണ്. മുല്ലപ്പള്ളിക്കും ചെന്നിത്തലയ്ക്കും ഉമ്മന്‍ചാണ്ടിക്കും മുഖ്യമന്ത്രിയാകാന്‍ യോഗ്യതയുണ്ടെന്നും കെസി ജോസഫ് പറഞ്ഞു.