സിപിഎം സംസ്ഥാന സെക്രട്ടറിയേറ്റ് യോഗം ഇന്ന് ചേരും

സീറ്റ് വിഭജനത്തിനായുള്ള ഉഭയകക്ഷി ചര്‍ച്ചകള്‍ക്ക് മുന്നോടിയായി സിപിഎം സംസ്ഥാന സെക്രട്ടറിയേറ്റ് യോഗം ഇന്ന് ചേരും. രാവിലെ പത്തിന് തിരുവനന്തപുരം എകെജി സെന്ററിലാണ് യോഗം. അടുത്ത മാസം 13ന് ആരംഭിക്കുന്ന കേരളയാത്രയുടെ ഒരുക്കങ്ങള്‍ യോഗം ചര്‍ച്ച ചെയ്യും. മേഖലാ ജാഥകള്‍ വിജയിപ്പിക്കാനാവശ്യമായ ക്രമീകരണങ്ങള്‍ ഉണ്ടാക്കണമെന്ന നിര്‍ദ്ദേശം കീഴ്ഘടകങ്ങള്‍ക്ക് സെക്രട്ടറിയേറ്റ് നല്‍കും. ലീഗുമായി ബന്ധപ്പെട്ട് എ വിജയരാഘവന്‍ നടത്തിയ വിവാദപ്രസ്താവനയും യോഗത്തില്‍ ചര്‍ച്ചയ്ക്ക് വരാന്‍ സാധ്യതയുണ്ട്. സ്ഥാനാര്‍ത്ഥി മാനദണ്ഡങ്ങള്‍ ചര്‍ച്ച ചെയ്യാന്‍ അടുത്തമാസം രണ്ട് മുതല്‍ നാല് വരെ സിപിഎമ്മിന്റെ സംസ്ഥാനനേതൃയോഗങ്ങള്‍ ചേരുന്നുണ്ട്. അതേസമയം, കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ ഇന്ന് പാണക്കാട് എത്തും. രാവിലെ ഒമ്പത് മണിയോടെയാണ് മുല്ലപ്പള്ളി പാണക്കാട് ഹൈദരലി ശിഹാബ് തങ്ങളുടെ വസതിയില്‍ എത്തുക. ഉമ്മന്‍ചാണ്ടിടെയും രമേഷ് ചെന്നിത്തലയുടെയും സന്ദര്‍ശനത്തിന് പിന്നാലെയാണ് മുല്ലപ്പള്ളിയും പാണക്കാട് എത്തുന്നത്. യുഡിഎഫിലെ ഉഭയകക്ഷി ചര്‍ച്ചകള്‍ സജീവമായിരിക്കെ മുല്ലപ്പള്ളി നടത്തുന്ന സന്ദര്‍ശനം രാഷ്ട്രീയ നീക്കമായാണ് വിലയിരുത്തുന്നത്. സീറ്റ് വിഭജനവുമായി ബന്ധപ്പെട്ട വിഷയങ്ങളില്‍ ലീഗ് നേതൃത്വവുമായി കെപിസിസി അധ്യക്ഷന്‍ ചര്‍ച്ച നടത്തിയേക്കും. രാഷ്ട്രീയ കൊലപാതക ആരോപണം ഉയര്‍ന്ന കീഴാറ്റൂരും മുല്ലപ്പള്ളി സന്ദര്‍ശനം നടത്തും.