‘ശോഭ’യില്ലാത്ത ബിജെപി യോഗം,

പ്രശ്‌നപരിഹാരമില്ലാതെ യോഗത്തിനില്ലെന്ന് ശോഭാ സുരേന്ദ്രന്‍

കേന്ദ്ര നേതൃത്വം ഇടപെട്ടിട്ടും ശോഭാ സുരേന്ദ്രന്‍ പ്രശ്‌നം പരിഹരിക്കാതെ ബിജെപി സംസ്ഥാന നേതൃത്വം. പ്രശ്‌ന പരിഹാരമാകാതിരുന്നതോടെ ഇന്ന് നടക്കുന്ന സംസ്ഥാന കമ്മിറ്റി യോഗത്തില്‍ നിന്നും ശോഭാ സുരേന്ദ്രന്‍ വിട്ടുനില്‍ക്കുകയാണ്. പ്രശ്‌നം പരിഹരിക്കണമെന്ന് ദേശീയ നേതൃത്വം ആവശ്യപ്പെട്ടിട്ടും സംസ്ഥാന നേതൃത്വം തടയിടുകയാണെന്നാണ് ശോഭയുടെ പരാതി. താന്‍ ഉന്നയിച്ച പ്രശ്‌നങ്ങള്‍ പരിഹരിക്കാത്തിടത്തോളം യോഗങ്ങളില്‍ നിന്ന് വിട്ടു നില്‍ക്കുമെന്ന് ശോഭ ആവര്‍ത്തിച്ചു. അതേ സമയം ശോഭ സുരേന്ദ്രനുമായി പ്രശ്‌നങ്ങളൊന്നും ഇല്ലെന്നും യോഗങ്ങളില്‍ പങ്കെടുക്കാത്തതെന്താണെന്ന് അവരോട് തന്നെ ചോദിക്കണമെന്നാണ് ഇത് സംബന്ധിച്ച് ബിജെപി സംസ്ഥാന അധ്യക്ഷന്‍ കെ സുരേന്ദ്രന്റെ പ്രതികരണം. തൃശൂരില്‍ ചേരുന്ന യോഗത്തില്‍ സ്ഥാനാര്‍ത്ഥി നിര്‍ണയത്തെ കുറിച്ചുള്ള പ്രാഥമിക ചര്‍ച്ചകളുണ്ടാകും.എ പ്ലസ് മണ്ഡലങ്ങളില്‍ സ്ഥാനാര്‍ത്ഥികളെ കുറിച്ച് ഏകദേശ ധാരണയായിട്ടുണ്ട്. നേമത്ത് കുമ്മനത്തെയും, വട്ടിയൂര്‍ക്കാവില്‍ വി.വി.രാജേഷ്,അടക്കമുള്ള നേതാക്കളെ ഇറക്കാനാണ് പ്രാഥമിക ധാരണ. സംസ്ഥാന ജനറല്‍ സെക്രട്ടറിമാര്‍ എല്ലാവരും മത്സരരംഗത്തുണ്ടാകും. അധ്യക്ഷന്‍ കെ.സുരേന്ദ്രന്‍ മത്സരിക്കുമോ എന്നതില്‍ അന്തിമ തീരുമാനമായിട്ടില്ല. ഇക്കാര്യത്തില്‍ കേന്ദ്രത്തിന്റേ തീരുമാനം നിര്‍ണായമാകും.