കോഴിക്കോട് കൂടുതല്‍ സീറ്റ് വേണം; കര്‍ശന നിലപാടുമായി മുസ്ലീം ലീഗ്

സീറ്റ് വിഭജനത്തില്‍ കോഴിക്കോട് ജില്ലയില്‍ കൂടുതല്‍ പരിഗണന വേണമെന്ന കര്‍ശന നിലപാടുമായി മുസ്ലീം ലീഗ് ജില്ല നേതൃത്വം. സീറ്റ് വച്ചുമാറിയുള്ള നീക്കുപോക്കിനില്ലെന്നും ജില്ലയില്‍ കൂടുതല്‍ സീറ്റ് ആവശ്യപ്പെടുമെന്നും ജില്ലാ നേതൃത്വം വ്യക്തമാക്കി.ലീഗ് മല്‍സരിച്ചിരുന്ന കുന്നമംഗലം കഴിഞ്ഞ തവണ കോണ്‍ഗ്രസ് ഏറ്റടുത്ത് പകരം ബാലുശ്ശേരി ലീഗിന് നല്‍കിയിരുന്നു. എന്നാല്‍ രണ്ടിടത്തും യുഡിഎഫ് പരാജയപ്പെട്ടു. ഇത്തവണ ഇത്തരമൊരു പരീക്ഷണത്തിനില്ലെന്നാണ് ലീഗ് നേതൃത്വം വ്യക്തമാക്കുന്നത്. കുന്നമംഗലത്ത് ഇത്തവണ ലീഗ് തന്നെ മല്‍സരിക്കാനാണ് തീരുമാനം.
കഴിഞ്ഞ തവണ ലീഗിലുണ്ടായ പ്രാദേശിക പ്രശ്‌നങ്ങള്‍ മൂലം നഷ്ടമായ കൊടുവള്ളി തിരിച്ച് പിടിക്കുകയാണ് ഇത്തവണ ലീഗിന്റെ ലക്ഷ്യം. തദ്ദേശ തെരഞ്ഞെടുപ്പില്‍ സീറ്റ് നല്‍കുന്നതുമായി ബന്ധപ്പെട്ട് ചില പ്രാദേശിക പ്രശ്‌നങ്ങള്‍ ഉണ്ടായിരുന്നു. ശക്തമായ നടപടി എടുത്ത് ഈ പ്രശ്‌നങ്ങളെല്ലാം പരിഹരിച്ചുവെന്നാണ് ലീഗിന്റെ അവകാശ വാദം.ലോക്‌സഭ തെരഞ്ഞെടുപ്പില്‍ രാഹുല്‍ ഗാന്ധിക്ക് വേണ്ടി മല്‍സര രംഗത്ത് നിന്ന് പിന്മാറിയ ടി സിദ്ദിഖ് തിരുവമ്പാടിയില്‍ മല്‍സരിക്കാനാണ് താല്‍പ്പര്യം പ്രകടിപ്പിച്ചത്. എന്നാല്‍ ഈ സീറ്റ് കോണ്‍ഗ്രസിന് വിട്ടു നല്‍കില്ലെന്നാണ് ലീഗ് നിലപാട്. ജനതാദള്‍ മല്‍സരിച്ച വടകരയും കേരള കോണ്‍ഗ്രസ് മല്‍സരിച്ച പേരാമ്പ്രയും ഉള്‍പ്പെടെ ജില്ലയില്‍ ഇത്തവണ ലീഗ് കൂടുതല്‍ സീറ്റ് ആവശ്യപ്പെടും.