മുനീര്‍ കൊടുവള്ളിയിലേക്ക് വരേണ്ടെന്ന് നേതാക്കള്‍

കോഴിക്കോട് സൗത്തില്‍ തന്നെ ശരണം

പ്രതിപക്ഷ ഉപനേതാവ് ഡോ: എംകെ മുനീര്‍ മൂന്നാം തവണയും കോഴിക്കോട് സൗത്ത് നിയേജകമണ്ഡലത്തില്‍ നിന്നും ജനവിധി തേടും. സംസ്ഥാന നേതൃത്വം ഇത് സംബന്ധിച്ച് മണ്ഡലം കമ്മിറ്റിക്ക് നിര്‍ദേശം നല്‍കി. കൊടുവള്ളിയില്‍ മത്സരിക്കാന്‍ മുനീര്‍ താല്‍പര്യം പ്രകടിപ്പിച്ചിരുന്നുവെങ്കിലും നേതാക്കള്‍ക്ക് താല്‍പര്യമുണ്ടായിരുന്നില്ല.
കൊടുവള്ളി കേന്ദ്രീകരിച്ചുള്ള നേതാക്കള്‍ക്ക് അവിടെ മത്സരിക്കേണ്ടതുണ്ട്. അതിനാലായിരുന്നു മുനീര്‍ വരുന്നതില്‍ അതൃപ്തി അറിയിച്ചത്. മണ്ഡലത്തില്‍ തന്നെയുള്ള സ്ഥാനാര്‍ത്ഥി ഇവിടെ മത്സരിക്കണമെന്ന് നിയോജക മണ്ഡലം കമ്മിറ്റി പ്രമേയം പാസാക്കുകയായിരുന്നു.
സംസ്ഥാന ജനറല്‍ സെക്രട്ടറി കെപിഎ മജീദ് ഉള്‍പ്പെടെ നേതാക്കള്‍ പങ്കെടുത്ത മണ്ഡലം കമ്മിറ്റി യോഗത്തിലാണ് മൂനീര്‍ സൗത്ത് നിയോജക മണ്ഡലത്തില്‍ തന്നെ മത്സരിക്കാന്‍ ധാരണയായത്.
2011 ലാണ് എംകെ മുനീര്‍ കോഴിക്കോട് സൗത്തില്‍ നിന്നും ആദ്യമായി ജനവിധി തേടുന്നത്. അന്ന് എതിര്‍സ്ഥാനാര്‍ത്ഥി സിപിഐഎമ്മിലെ മുസാഫര്‍ അഹമ്മദ് ആയിരുന്നു. 2016 ല്‍ ഐഎന്‍എല്ലിന്റെ പ്രൊഫസര്‍ അബ്ദുള്‍ വഹാബായിരുന്നു മുനീറിനെതിരെ മത്സരിച്ചത്.
ഇത്തവണയും പാര്‍ട്ടി മുസാഫര്‍ അഹമ്മദിനെ തന്നെയാണ് പരിഗണിക്കുന്നത്. നിലവില്‍ കോഴിക്കോട് ഡെപ്യൂട്ടി മേയറാണ് മുസാഫര്‍ അഹമ്മദ്. 2011 ല്‍ 1376 വോട്ടിനാണ് മുസാഫര്‍ അഹമ്മദ് പരാജയപ്പെട്ടത്. 1991 ല്‍ മുനീര്‍ കോഴിക്കോട് രണ്ടാം മണ്ഡലത്തില്‍ നിന്നായിരുന്നു ആദ്യമായി മത്സരിച്ചത്. അന്ന് സിപിഐഎമ്മിലെ സിപി കുഞ്ഞുവിനോടായിരുന്നു മത്സരം. അദ്ദേഹത്തിന്റെ മകനാണ് മുസാഫര്‍ അഹമ്മദ്.