അയോധ്യ ക്ഷേത്ര നിര്‍മ്മാണ ഫണ്ട് പിരിവ് ആലപ്പുഴയില്‍ കോണ്‍ഗ്രസ് നേതാവ് ഉദ്ഘാടനം ചെയ്തു

അയോധ്യ ക്ഷേത്ര നിര്‍മ്മാണ ഫണ്ട് പിരിവ് കോണ്‍ഗ്രസ് നേതാവ് ഉദ്ഘാടനം ചെയ്ത സംഭവം വിവാദമായി. ആലപ്പുഴ ഡിസിസി ഉപാധ്യക്ഷന്‍ രഘുനാഥ പിള്ള ആണ് ആര്‍എസ്എസ് ഫണ്ട് ശേഖരണം ഉദ്ഘാടനം ചെയ്തത്. നവമാധ്യമങ്ങളില്‍ കോണ്‍ഗ്രസ് പ്രവര്‍ത്തകര്‍ തന്നെ ഇതിനെതിരെ രൂക്ഷ വിമര്‍ശനവുമായി രംഗത്തു വന്നു.
കഴിഞ്ഞ ദിവസമാണ് പള്ളിപ്പുറം പട്ടാര്യസമാജം പ്രസിഡന്റ് കൂടിയായ രഘുനാഥപിള്ള കടവില്‍ ക്ഷേത്രത്തില്‍ വച്ച് ഫണ്ട് കൈമാറിയത്. ക്ഷേത്രമേല്‍ശാന്തിക്കാണ് രഘുനാഥപിള്ള ഫണ്ട് കൈമാറിയത്. ജനുവരി 30 മുതല്‍ ഫെബ്രുവരി 28 വരെയാണ് രാമക്ഷേത്രനിര്‍മ്മാണത്തിനുള്ള ഫണ്ട് പിരിവ് നടക്കുന്നത്. ഇതേത്തുടര്‍ന്നാണ് നവമാധ്യമങ്ങളിലടക്കം കോണ്‍ഗ്രസ് പ്രവര്‍ത്തകര്‍ രഘുനാഥ പിള്ളയ്‌ക്കെതിരെ രംഗത്തുവന്നത്. ആലപ്പുഴ ഡിസിസിയുടെ ഔദ്യോഗിക ഫേസ്ബുക്ക് പേജിലും ഈ ചിത്രങ്ങള്‍ പോസ്റ്റ് ചെയ്തുകൊണ്ട് പ്രവര്‍ത്തകര്‍ വിമര്‍ശനവുമായെത്തി.
ക്ഷേത്ര ഭാരവാഹി എന്ന നിലയില്‍ ആണ് മാത്രം ചടങ്ങ് ഉദ്ഘാടനം ചെയ്തതെന്നാണ് രഘുനാഥ പിള്ളിയുടെ വിശദീകരണം. പാര്‍ട്ടിയിലെ ഗ്രൂപ്പ് പോരിന്റെ ഭാഗം ആണ് തനിക്കെതിരായ വിമര്‍ശനങ്ങളെന്നും രഘുനാഥപിള്ള പ്രതികരിച്ചു.