ഗ്രെറ്റ തന്‍ബര്‍ഗിന്റെ ടൂള്‍കിറ്റ്: വിശദാംശങ്ങള്‍ തേടി ഡല്‍ഹി പൊലീസ്

ഗൂഗിളിന് കത്ത് നല്‍കി

ഗ്രെറ്റ തന്‍ബര്‍ഗ് ട്വീറ്റ് ചെയ്ത ടൂള്‍കിറ്റിന്റെ വിശദാംശം തേടി ഡല്‍ഹി പൊലീസ്. കേസെടുത്തതിനു പിന്നാലെ ഡല്‍ഹി പൊലീസ് ഗൂഗിളിന് കത്ത് നല്‍കി.കാനഡയിലെ ഖാലിസ്ഥാന്‍ സംഘടനയാണ് ഈ ടൂള്‍കിറ്റ് നിര്‍ദ്ദേശങ്ങള്‍ക്ക് പിന്നിലെന്നാണ് പൊലീസിന്റെ പ്രാഥമിക നിഗമനം. എങ്ങനെ സമരം ചെയ്യണമെന്നത് വിശദീകരിച്ചുകൊണ്ടുള്ള നിര്‍ദ്ദേശങ്ങള്‍ അടങ്ങിയ ലിങ്കിനെ ടൂള്‍കിറ്റ് എന്ന് വിശേഷിപ്പിച്ച് ഗ്രെറ്റ ആദ്യം ട്വീറ്റ് ചെയ്തിരുന്നെങ്കിലും പിന്നീട് പിന്‍വലിച്ചിരുന്നു.
സാമൂഹിക മാധ്യമങ്ങളില്‍ സമരത്തെ അനുകൂലിച്ചും പ്രതികൂലിച്ചുമുള്ള വാക്‌പോര് തുടരുകയാണ്.അതിനിടെ കാര്‍ഷിക നിയമങ്ങള്‍ പിന്‍വലിക്കണം എന്നാവശ്യപ്പെട്ടുള്ള പ്രതിഷേധം ലോക്‌സഭയില്‍ ഇന്നും തുടരാനാണ് പ്രതിപക്ഷ തീരുമാനം. നടുത്തളത്തിലിറങ്ങിയുള്ള പ്രതിപക്ഷ പ്രതിഷേധം കാരണം ഇതുവരെ നന്ദിപ്രമേയ ചര്‍ച്ച ലോക്‌സഭയില്‍ തുടങ്ങാനായിട്ടില്ല. രാജ്യസഭയില്‍ ഒന്പതു മണിക്കൂര്‍ ചര്‍ച്ച പൂര്‍ത്തിയായി. തിങ്കളാഴ്ച പ്രധാനമന്ത്രി ചര്‍ച്ചയ്ക്ക് മറുപടി നല്‍കാനാണ് സാധ്യത. അതിര്‍ത്തിയില്‍ ഇന്നലെ എത്തിയ എംപിമാരെ തടഞ്ഞതിനെതിരെ പ്രതിപക്ഷം സ്പീക്കര്‍ക്ക് പരാതി നല്‍കി.