തിരഞ്ഞെടുപ്പ് സമിതികളുമായി ബി ജെ പി

തിരഞ്ഞെടുപ്പിനു മുന്നോടിയായി മുഴുവൻ നിയമസഭാ മണ്ഡലങ്ങളിലും പഠന ശിബിരങ്ങൾ പൂർത്തിയാക്കി ബിജെപി. നാലു മുതൽ ആറുവരെ ബൂത്തുകൾ കേന്ദ്രീകരിച്ച് ’ശക്തികേന്ദ്രം’ ക്ലസ്റ്ററുകൾ രൂപീകരിക്കാനുള്ള പ്രവർത്തനത്തിനും തുടക്കം കുറിച്ചു. ഓരോ ’ശക്തി കേന്ദ്ര’ത്തിന്റെയും ചുമതല പഞ്ചായത്ത് കമ്മിറ്റി പ്രസിഡന്റ് മുതൽ മുകളിലേക്കുള്ളവർക്കു നൽകും.

നിയോജക മണ്ഡലങ്ങളുടെ ചുമതല നേരത്തേ ജില്ലാ ഭാരവാഹികൾക്കു വീതിച്ചു നൽകിയിരുന്നു. സംഘടനാ സംവിധാനത്തെ തിരഞ്ഞെടുപ്പിനു സജ്ജമാക്കുകയാണ് ഉദ്ദേശ്യം. സ്ഥാനാർഥികളെ സംബന്ധിച്ച ആലോചനകളിലേക്ക് ഔദ്യോഗികമായി കടന്നിട്ടില്ല. ഓരോ മണ്ഡലത്തിൽനിന്നും മൂന്നു പേരുകൾ വീതമാകും ജില്ലാ കമ്മിറ്റി സംസ്ഥാന കമ്മിറ്റിക്കു നൽകുക.

മണ്ഡലം കമ്മിറ്റികളിൽനിന്നുള്ള നിർദേശം കൂടി പരിഗണിക്കുമെങ്കിലും മറ്റു പല ഘടകങ്ങൾ കൂടി പരിഗണിച്ചാകും മൂന്നു പേരുകൾ അന്തിമമാക്കുക. മണ്ഡലത്തിലെ സ്വീകാര്യത, എതിർ സ്ഥാനാർഥികളുമായുള്ള താരതമ്യം, സംഘടനാ പാടവം, കൂടുതൽ വോട്ടുകൾ സമാഹരിക്കാനുള്ള മിടുക്ക് എന്നിവയെല്ലാം ജില്ലാ നേതൃത്വം കണക്കിലെടുക്കും. രണ്ടു ദിവസത്തെ സന്ദർശനം കഴിഞ്ഞാലുടൻ സ്ഥാനാർഥി നിർണയം സംബന്ധിച്ച നിർദേശം ജില്ലാ കമ്മിറ്റികൾക്കു ലഭിക്കും.

ഇതിനുശേഷം മാത്രമേ മണ്ഡലങ്ങളിൽനിന്നു പട്ടിക ഔദ്യോഗികമായി ആവശ്യപ്പെടുകയുള്ളൂ. സംസ്ഥാന അധ്യക്ഷൻ കെ.സുരേന്ദ്രന്റെ തിരഞ്ഞെടുപ്പു പ്രചാരണ പര്യടനം നടത്തും. അതിനു മുൻപായി സ്ഥാനാർഥികളെക്കുറിച്ചു ധാരണയുണ്ടാക്കണമെന്നാണു ജില്ലാ നേതൃത്വത്തിന്റെ തീരുമാനം.