ചാണ്ടി ഉമ്മന്റെ വിവാദ പ്രസംഗം: പ്രതിഷേധവുമായി കെസിബിസി

യൂറോപ്പിലെ പള്ളികള്‍ പലതും വ്യാപാര കേന്ദ്രങ്ങളും ബാറുകളുമായി മാറിയെന്ന ചാണ്ടി ഉമ്മന്റെ പ്രസംഗത്തിലെ പരാമര്‍ശത്തില്‍ പ്രതിഷേധവുമായി കെസിബിസി. യുവ നേതാക്കള്‍ ചരിത്രം അറിയാതെ നടത്തുന്ന പ്രസംഗം ക്രൈസ്തവ സമൂഹത്തിന് വേദനയുണ്ടാക്കിയെന്ന് കെസിബിസി വ്യക്തമാക്കി. പത്ത് ദിവസം മുന്‍പ് യൂത്ത് ലീഗ് സംഘടിപ്പിച്ച പരിപാടിയിലായിരുന്നു വിവാദ പ്രസംഗം.
നിയമസഭ തെരഞ്ഞെടുപ്പിന് മുന്‍പ് കേരള രാഷ്ട്രീയത്തില്‍ ചുവടുറപ്പിക്കാന്‍ ശ്രമിക്കുന്ന ചാണ്ടി ഉമ്മന് കല്ലുകടിയായിരുന്നു ഈ പ്രസംഗം. ഹലാല്‍ സ്റ്റിക്കര്‍ വിവാദത്തില്‍ യൂത്ത് ലീഗ് സംഘടിപ്പിച്ച പരിപാടിയിലായിരുന്നു തുര്‍ക്കിയിലെ ചരിത്ര പ്രസിദ്ധമായ ഹാഗിയ സോഫിയ പള്ളി പൊളിച്ച് മുസ്ലീം പള്ളിയാക്കിയിട്ടുണ്ടെന്നും പള്ളികള്‍ ഡാന്‍സ് ബാറുകള്‍ വരെയായിട്ടും ആര്‍ക്കും പ്രശ്‌നമില്ലെന്നും ചാണ്ടി ഉമ്മന്‍ പറഞ്ഞത്.
തുര്‍ക്കി ഭരണാധികാരി നടത്തിയ പ്രവര്‍ത്തി ക്രൈസ്തവ സമൂഹത്തിന് അപരിഹാര്യമായ പ്രസ്‌നങ്ങളാണ് ഉണ്ടാക്കിയതെന്നാണ് കെസിബിസി മറുപടിയില്‍ പറഞ്ഞത്. ചരിത്രമറിയാതെ പ്രസംഗിക്കുന്ന യുവ നേതാക്കള്‍ ഇക്കാര്യം ശ്രദ്ധിക്കണമെന്നും കെസിബിസി വ്യക്തമാക്കുന്നു. സംഭവം വിവാദമായതോടെ ചാണ്ടി ഉമ്മന്‍ നേരത്തെ മാപ്പ് പറഞ്ഞ് രംഗത്ത് വന്നിരുന്നു. യുഡിഎഫില്‍ നിന്ന് ക്രിസ്തീയ വിഭാഗങ്ങള്‍ അകലുന്നുവെന്ന പ്രചാരണം നിലനില്‍ക്കെയാണ് ചാണ്ടി ഉമ്മന്റെ വിവാദ പ്രസംഗവും. ഇടത് ക്യാമ്പാകട്ടെ പ്രസംഗത്തിന് വലിയ പ്രചാരണമാണ് സോഷ്യല്‍ മീഡിയയില്‍ നല്‍കുന്നത്.