സോളാർ കഥ ഓർമ്മിപ്പിച്ച് ഐശ്വര്യ കേരളയാത്ര

പ്രതിപക്ഷനേതാവ് രമേശ് ചെന്നിത്തലയുടെ 'ഐശ്വര്യകേരള യാത്ര'യിൽ 'സോളാറി'നെ ഓർമിപ്പിച്ച് കലാജാഥ കടന്നു കൂടിയത് പാർട്ടയിൽ വിവാദമാവുന്നു.
കഴിഞ്ഞ ദിവസം നടന്ന പത്രസമ്മേളനത്തിൽ ഉമ്മൻചാണ്ടിയുടെ ഭരണത്തെ തള്ളിപ്പറഞ്ഞ ചെന്നിത്തലയുടെ റാഥ വീണ്ടും പാർട്ടിക്കുള്ളിൽ പുതിയ വിവാദമായിരിക്കുകയാണ്. സി പി എം അനുകൂല മാധ്യമങ്ങളിലൂെയാണ് വാർത്ത പുറത്തുവന്നത്.
ചെന്നിത്തലയുടെ അംഗീകാരത്തോടെ തീരുമാനിച്ച സ്‌ക്രിപ്റ്റാണിത്. ജാഥയ്ക്ക് മുന്നോടിയായാണ് കലാജാഥ സ്വീകരണ സ്ഥലത്തെത്തുന്നത്. 'സോളാർ' എന്ന് എഴുതിയ ബോർഡും കലാകാരന്മാർ പ്രദർശിപ്പിക്കുന്നു.

കേസ് സിബിഐയ്ക്ക് വിടാനുള്ള സർക്കാർ തീരുമാനത്തിന് എതിരെയെന്ന് തോന്നിപ്പിക്കും വിധമാണ് അവതരണം. കഴിഞ്ഞ യുഡിഎഫ് സർക്കാരിന്റെ ഏറ്റവും വലിയ അഴിമതിയായ സോളാർ കേസ് ഇത്തവണയും എൽഡിഎഫിന്റെ പിടിവള്ളിയാണെന്ന് കലാജാഥ വിളിച്ചു പറയുന്നു. എന്നാൽ, ചെന്നിത്തലയുടെ ലക്ഷ്യം ഉമ്മൻചാണ്ടിയാണെന്ന് ആർക്കും ബോധ്യമാകുന്നതാണ് അനവസരത്തിൽ കയറിയുള്ള 'സോളാർ' കളിയെന്ന് ചില കോൺഗ്രസ് നേതാക്കൾ കെ പി സി സി യെ പരാതി അറിയിച്ചു.

ഐശ്വര്യകേരള യാത്രയിൽ 'സോളാർ' വിഷയം പറയുന്നത് പരോക്ഷമായി ഉമ്മൻചാണ്ടിക്ക് തിരിച്ചടിയാകുന്നതായി ഇവർ പാർടിയിൽ ആക്ഷേപവും ഉന്നയിച്ചിട്ടുണ്ട്. ഉമ്മൻചാണ്ടി സർക്കാരിനെ ജനം തിരസ്‌കരിച്ചതിനുപിന്നിൽ ഭരണകാലത്തെ പിൻവാതിൽനിയമനവും കാരണമായെന്ന ചെന്നിത്തലയുടെ വാർത്താ സമ്മേളനത്തിലെ പ്രതികരണം പല കോൺഗ്രസ് നേതാക്കളിലും അമർഷമുണ്ടാക്കിയിട്ടുണ്ട്.