കോട്ടയത്ത് യുവനേതൃത്വം കോൺഗ്രസിൽ ഇടയുന്നു

പി സി ജോർജിനെയും മാണി സി കാപ്പനെയും സ്ഥാനാർത്ഥി ആക്കാനുള്ള മുതിർന്ന നേതാക്കളുടെ നീക്കത്തിൽ പ്രതിഷേധിച്ച് കോട്ടയത്ത് കോൺഗ്രസിൽ നിന്ന് പ്രധാനനേതാക്കൾ കൂടുമാറ്റത്തിന്ഒ രുങ്ങുന്നു.
ഏറ്റുമാനൂർ, പാലാ, പൂഞ്ഞാർ , കാഞ്ഞിരപ്പള്ളി സീറ്റുകൾ ആഗ്രഹിച്ച് ജോലികൾ തുടങ്ങിവെച്ച ആളുകളെ ലക്ഷ്യമിട്ടാണ് മറുപക്ഷത്തുനിന്ന് നീക്കം തുടങ്ങിയിരിക്കുന്നത്.
കേരള കോൺഗ്രസിലെ ജോസ് കെ മാണി പക്ഷത്തെ പുറത്താക്കിയതോടെ കേരള കോൺഗ്രസ് മത്സരിച്ചിരുന്ന ആറിൽ അഞ്ചു സീറ്റുകളും ഇനി കോൺഗ്രസിന് മത്സരിക്കാൻ ലഭിക്കുമെന്ന പ്രതീക്ഷയ്ക്കിടെ പുതിയ നീക്കം കോട്ടയത്തെ കോൺഗ്രസുകാരുടെ സ്ഥിതി വീണ്ടും അധോഗതി ആക്കി.

പൂഞ്ഞാറിലും പാലായിലും ഉൾപ്പെടെ ചങ്ങനാശ്ശേരി, ഏറ്റുമാനൂർ, കാഞ്ഞിരപ്പള്ളി എന്നീ 5 സീറ്റുകളെങ്കിലും കോൺഗ്രസിന് മത്സരിക്കാൻ ലഭിക്കുമെന്ന പ്രതീക്ഷയിലായിരുന്നു നേതാക്കൾ. എന്നാൽ പിസി ജോർജ് തിരികെ വരുന്നതോടെ പൂഞ്ഞാറും മാണി സി കാപ്പൻ എത്തുന്നതോടെ പാലായും നഷ്ടപ്പെടുമെന്നുറപ്പായി. മുൻപ് ജോസഫ് വിഭാഗം മത്സരിച്ച ജില്ലയിലെ ഏക സീറ്റെന്ന നിലയിൽ കടുത്തുരുത്തി അവർക്ക് വിട്ടുനൽകുന്നതിൽ ആർക്കും തർക്കമില്ല.

മരിക്കുന്നതിനു മുമ്പ് സിഎഫ് തോമസ് ജോസഫ് വിഭാഗത്തോടൊപ്പമായിരുന്നെന്ന കാരണത്താൽ ചങ്ങനാശ്ശേരിയും ജോസഫ് അവകാശപ്പെടുകയാണ്.

എങ്കിലും അതിനു വഴങ്ങാതെ കോട്ടയത്ത് രണ്ടാം സീറ്റായി ചങ്ങനാശ്ശേരിയും മൂന്നും നാലും സീറ്റുകളായി ഏറ്റുമാനൂരും കാഞ്ഞിരപ്പള്ളിയുമാണ് ജോസഫ് വിഭാഗം അവകാശപ്പെടുന്നത്.

ഇതോടെ ജോസഫിൻറെ നാലും പൂഞ്ഞാറും പാലായും കൂടിയാകുമ്പോൾ മുമ്പ് ജോസ് കെ മാണി വിഭാഗം ഉണ്ടായിരുന്ന കാലത്തെ മുഴുവൻ സീറ്റുകളും വീണ്ടും ഘടകകക്ഷികൾക്കായി മാറുകയാണ്.

ഇങ്ങനെവന്നാൽ കോൺഗ്രസിന് മത്സരിക്കാൻ ലഭിക്കുക പഴയ സീറ്റുകളായ പുതുപ്പള്ളിയും കോട്ടയവും ഇടതു കോട്ടയായ വൈക്കവും മാത്രമാണ്. കാഞ്ഞിരപ്പള്ളി, ഏറ്റുമാനൂർ എന്നിവയിൽ ഒരു സീറ്റുകൂടി ചിലപ്പോൾ ലഭിച്ചേക്കാം.

ജില്ലയിലാകെ മുന്നൂറു പ്രവർത്തകർ തികച്ചില്ലാത്ത ജോസഫിൻറെ പാർട്ടി 4 സീറ്റുകളിൽ മത്സരിക്കുകയാണ് ഇത് അംഗീകരികകാൻ ആവില്ലന്നാണ് ഒരു മുതിർന്ന യുവ നേതാവ് പറഞ്ഞത്.

ചങ്ങനാശ്ശേരിയിൽ ഡോ. അജിസ് ബെൻ മാത്യുവും , ഏറ്റുമാനൂരിൽ ലതികാ സുഭാഷും ഫിലിപ്പ് ജോസഫും, പൂഞ്ഞാറിൽ ടോമി കല്ലാനിയും, കാഞ്ഞിരപ്പള്ളിയിൽ ജോഷി ഫിലിപ്പുമൊക്കെ മത്സരിക്കാൻ തക്കം പാർത്തിരുന്നവരാണ്. പാലായിൽ ജോസഫ് വാഴയ്ക്കനെയും ടോമി കല്ലാനിയെയും പരിഗണിച്ചിരുന്നു.

ഇത്തവണകൂടി അവസരം ലഭിച്ചില്ലെങ്കിൽ കല്ലാനിയേയും ലതികയേയും ജോഷി ഫിലിപ്പിനെപ്പോലെയുമുള്ളവരുടെ രാഷ്ട്രീയ ഭാവിതന്നെ അവതാളത്തിലാകും. ഗോപകുമാർ നാട്ടകം സുസ്ലഷ് തുടങ്ങിയ നേതാക്കളും ഹൈക്കമാന്റിന്റെ തീരുമാനത്തിൽ പ്രതീക്ഷിച്ച് ഇരിക്കുകയാണ്. അനുകൂല തീരുമാനം ഉണ്ടായില്ലങ്കിൽ പാരമ്പര്യ സീറ്റുകളിൽ ഇവരിൽ ചിലരെ എതിർ പക്ഷത്ത് കാണാനും ഇടയുണ്ട്.