ഫെബ്രുവരി 26ന് ഭാരത് ബന്ദിന് ആഹ്വാനം

ചരക്കുസേവന നികുതിയിലെ പ്രശ്നങ്ങള്‍ പരിഹരിക്കണമെന്ന് ആവശ്യപ്പെട്ടുകൊണ്ട് ഭാരത് ബന്ദിന് ആഹ്വാനവുമായി വ്യാപാര സംഘടനയായ കോണ്‍ഫെഡറേഷന്‍ ഓഫ് ഓള്‍ ഇന്ത്യ ട്രേഡേഴ്സ് (സിഎഐടി). ഫെബ്രുവരി 26ന് ആഹ്വാനം ചെയ്തിരിക്കുന്ന ബന്ദില്‍ റോഡ് ഉപരോധിക്കുമെന്ന് പ്രസ്താവനയില്‍ സിഎഐടി വ്യക്തമാക്കി.
വ്യപാരികളുടെ പ്രശ്നങ്ങള്‍ പരിഹരിക്കുവാനോ അവരെ അലട്ടുന്ന ബുദ്ധിമുട്ടുകള്‍ ഉള്‍കൊള്ളുവാനോ ജിഎസ്ടി കൗണ്‍സില്‍ ഇതുവരെ തയ്യാറായിട്ടില്ലെന്നും സിഎഐടി വിമര്‍ശിച്ചു. പരാതികളുമായി പല തവണ കൗണ്‍സിനെ സമീപിച്ചു. അവര്‍ സ്വന്തം അജന്‍ഡയുമായി മുന്നോട്ടുപോകുന്നതല്ലാതെ മറ്റൊരു നടപടിയും ഇതേവര സ്വീകരിച്ചിട്ടില്ല. ഇതിന് ഉടനടി പരിഹാരം കാണണമെന്ന് ആവശ്യപ്പെട്ടുകൊണ്ടാണ് ഭാരത് ബന്ദ് നടത്തുന്നത്. ബന്ദിന് പിന്തുണയറിയിച്ചുകൊണ്ട് ഓള്‍ ഇന്ത്യ ട്രാന്‍സ്‌പോര്‍ട്ട് വെല്‍ഫെയര്‍ അസോസിയേഷനും രംഗത്തെത്തി.
ഒരു രാജ്യം ഒരു നികുതി എന്ന ആഹ്വാനവുമായാണ് കേന്ദ്രം ജിഎസ്ടി കൊണ്ടുവന്നത്. എന്നാല്‍ അതില്‍ പല അപാകതകളും ഉണ്ട്. എല്ലാവരെയും വിശ്വാസത്തിലെടുത്തായിരിക്കും ജിഎസ്ടി നടപ്പാക്കുക എന്ന പ്രധാനമന്ത്രിയുടെ വാഗ്ദാനം പാലിക്കപ്പെട്ടില്ലെന്നും സിഎഐടി കുറ്റപ്പെടുത്തി.