മുന്‍ പിഎസ്സി ചെയര്‍മാന്‍ കെ.എസ് രാധാകൃഷ്ണന്റെ അധിക പെന്‍ഷനും ആനുകൂല്യങ്ങളും തിരിച്ചുപിടിക്കാന്‍ തീരുമാനം

മുന്‍ പിഎസ്സി ചെയര്‍മാന്‍ ഡോ. കെ.എസ് രാധാകൃഷ്ണനെതിരെ നടപടിക്ക് തീരുമാനം. കെ. എസ് രാധാകൃഷ്ണന്റെ അധിക പെന്‍ഷനും ആനുകൂല്യങ്ങളും തിരിച്ചുപിടിക്കാനാണ് തീരുമാനം. ഇന്നലെ ചേര്‍ന്ന മന്ത്രിസഭാ യോഗത്തിലാണ് ഇത് സംബന്ധിച്ച തീരുമാനമുണ്ടായത്.
മുന്‍ യുഡിഎഫ് സര്‍ക്കാരാണ് കെ. എസ് രാധാകൃഷ്ണന്റെ പെന്‍ഷനും ആനുകൂല്യങ്ങളും ഇരട്ടിയായി വര്‍ധിപ്പിച്ച് നല്‍കിയത്. 2013 മാര്‍ച്ച് 31നായിരുന്നു നടപടി. പിഎസ്സി ചെയര്‍മാന്‍ എന്ന നിലയിലുള്ള പെന്‍ഷനും ആനുകൂല്യങ്ങളും വേണമെന്ന കെ. എസ് രാധാകൃഷ്ണന്റെ കത്തിന്റെ അടിസ്ഥാനത്തിലായിരുന്നു അന്ന് മന്ത്രാസഭായോഗം ചേര്‍ന്ന് തീരുമാനമെടുത്തത്. ഇതിനെതിരെ കൊച്ചി ഇടപ്പള്ളി സ്വദേശി പി.എ ആന്റണി രംഗത്തെത്തി.
പിഎസ്സി ചെയര്‍മാന്‍ ആകുന്നതിന് മുന്‍പ് കെ.എസ് രാധാകൃഷ്ണന്‍ കാലടി സംസ്‌കൃത സര്‍വകലാശാലയിലെ റീഡറായിരുന്നു. ചെയര്‍മാന്‍ സ്ഥാനം താത്കാലികമാണെന്നിരിക്കെ റീഡറായിരുന്ന സമയത്തെ ശമ്പളം അടിസ്ഥാനമാക്കിവേണം പെന്‍ഷനും മറ്റ് ആനുകൂല്യങ്ങളും നിശ്ചയിക്കാന്‍ എന്ന് ചൂണ്ടിക്കാട്ടയാണ് പി.എ ആന്റണി രംഗത്തെത്തിയത്. ഇക്കാര്യം വ്യക്തമാക്കി 2016 ല്‍ അദ്ദേഹം സര്‍ക്കാരിന് കത്ത് നല്‍കുകയും ചെയ്തിരുന്നു. ഇതിന്റെ അടിസ്ഥാനത്തിലാണ് നടപടി.