ഭാര്യയെ സംശയം: ഉറക്കത്തിനിടെ കഴുത്തറുത്തു; മാതാപിതാക്കള്‍ വിളിച്ചിട്ടും വാതില്‍ തുറന്നില്ല

ആറുമാസം മുന്‍പ് വിവാഹം കഴിച്ച യുവതിയെ ഭര്‍ത്താവ് കഴുത്തറുത്ത് കൊലപ്പെടുത്തിയത് സംശയത്തെ തുടര്‍ന്നാണെന്ന് പൊലീസ്.കൊടിയത്തൂര്‍ ചെറുവാടി പഴംപറമ്പില്‍ നാട്ടിക്കല്ലിങ്ങല്‍ ഷഹീര്‍ (30) ആണ് ഭാര്യ മുഹ്‌സിലയെ (20) ഉറക്കത്തിനിടയില്‍ കൊലപ്പെടുത്തിയത്. ചൊവ്വാഴ്ച പുലര്‍ച്ചെ 4 മണിയോടെയായിരുന്നു സംഭവം. മുറിയില്‍ നിന്ന് ബഹളം കേട്ട് മാതാപിതാക്കള്‍ വാതില്‍ തുറക്കാന്‍ ആവശ്യപ്പെട്ടെങ്കിലും ഷഹീര്‍ തയാറായില്ല.
സമീപവാസികള്‍ എത്തിയതോടെ വാതില്‍ തുറന്ന് പുറത്തേക്ക് ഓടിയ ഷഹീറിനെ പിടികൂടി പൊലീസില്‍ അറിയിക്കുകയായിരുന്നു. മുറിയില്‍ രക്തത്തില്‍ കുളിച്ചു കിടക്കുകയായിരുന്ന മുഹ്‌സിലയെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. വിദേശത്തായിരുന്ന ഷഹീര്‍ വിവാഹത്തിനു ശേഷം മടങ്ങിപോയിരുന്നില്ല. അടുത്തിടെയാണ് മലപ്പുറം ഒതായിലെ വീട്ടില്‍ നിന്നും മുഹ്‌സില ഭര്‍തൃവീട്ടില്‍ എത്തിയത്. കൊലപാതകത്തിന് ഉപയോഗിച്ച കത്തി തെളിവെടുപ്പിനിടെ പൊലിസ് കണ്ടെത്തി. താമരശ്ശേരി ഡിവൈഎസ്പി എന്‍.സി.സന്തോഷ്, മുക്കം ഇന്‍സ്‌പെക്ടര്‍ എസ്.നിസാം എന്നിവരുടെ നേതൃത്വത്തില്‍ അന്വേഷണം ആരംഭിച്ചു. ഒതായി ചൂളാട്ടിപ്പാറ പുളിക്കല്‍ മുജീബിന്റെയും കദീജയുടെയും മകളാണ് മുഹ്‌സില. സഹോദരങ്ങള്‍: മുഹ്‌സില്‍ റഹ്മാന്‍, മുസ്‌ന