അനുപമയുടെ ഹര്‍ജി സ്വീകരിച്ചില്ല; കുഞ്ഞ് നിയമവിരുദ്ധ കസ്റ്റഡിയിലല്ലെന്ന് കോടതി

ദത്തു വിവാദത്തില്‍ ഉള്‍പ്പെട്ട കുഞ്ഞിനെ വിട്ടുനല്‍കണം എന്നാവശ്യപ്പെട്ട് അമ്മ അനുപമ എസ്.ചന്ദ്രന്‍ സമര്‍പ്പിച്ച ഹേബിയസ് കോര്‍പസ് ഹര്‍ജി ഹൈക്കോടതി ഫയലില്‍ സ്വീകരിച്ചില്ല. ഹര്‍ജി പിന്‍വലിക്കാന്‍ അനുപമയ്ക്കു സമയം നല്‍കി. നിലവില്‍ കുഞ്ഞ് നിയമവിരുദ്ധ കസ്റ്റഡിയില്‍ അല്ലെന്നു വ്യക്തമാക്കിയ കോടതി, കേസ് കുടുംബകോടതി മുന്‍പാകെ പരിഗണനയില്‍ ഉള്ളതിനാല്‍ കേസ് അവിടെത്തന്നെ തുടരട്ടെ എന്ന നിലപാടെടുത്തു. കുടുംബകോടതിയുടെ പരിഗണനയിലുള്ള കേസില്‍ ഹൈക്കോടതിയുടെ അടിയന്തര ഇടപെടല്‍ ആവശ്യമില്ലെന്നും ഡിവിഷന്‍ ബെഞ്ച് വ്യക്തമാക്കി. ഡിഎന്‍എ പരിശോധന നടത്താന്‍ ശിശുക്ഷേമ സമിതിക്ക് അധികാരം ഉണ്ടല്ലോ എന്നും കോടതി ചോദിച്ചു. പിന്‍വലിച്ചില്ലെങ്കില്‍ തള്ളുമെന്നു വ്യക്തമാക്കിക്കൊണ്ടാണ് ഹര്‍ജി പിന്‍വലിക്കാന്‍ അനുപമയ്ക്കു കോടതി സമയം അനുവദിച്ചത്. അമ്മയുടെ സാമീപ്യം നിഷേധിക്കപ്പെട്ട കൈക്കുഞ്ഞിന്റെ അവകാശങ്ങള്‍ സംരക്ഷിക്കണം എന്ന ആവശ്യവുമായാണ് അനുപമ ഹൈക്കോടതിയില്‍ ഹേബിയസ് കോര്‍പസ് ഫയല്‍ ചെയ്തത്. ആശുപത്രി റജിസ്റ്ററിലും ജനന സര്‍ട്ടിഫിക്കറ്റിലും കുഞ്ഞിനെ സംബന്ധിച്ചു തെറ്റായ വിവരങ്ങളാണ് നല്‍കിയിട്ടുള്ളതെന്നും, ശിശുക്ഷേമ സമിതി അധികൃതരെ ഉള്‍പ്പെടെ സമീപിച്ചിട്ടും ഫലമുണ്ടായില്ലെന്നും കാണിച്ചാണ് ഹൈക്കോടതിയിലെത്തിയത്.