യാത്രക്കാരെ വലച്ച് കെഎസ്ആര്‍ടിസി സമരം; പണിമുടക്ക് തുടരുന്നു, സര്‍വീസുകള്‍ മുടങ്ങി

ശമ്പള പരിഷ്‌കരണം വൈകുന്നതടക്കം വിവിധ വിഷയങ്ങള്‍ ചൂണ്ടിക്കാട്ടി സംയുക്ത സമരസമിതിയുടെ നേതൃത്വത്തില്‍ കെഎസ്ആര്‍ടിസി ജീവനക്കാര്‍ നടത്തുന്ന പണിമുടക്ക് ഇന്നും തുടരുന്നു. വെള്ളിയാഴ്ച ആരംഭിച്ച പണിമുടക്ക് കോണ്‍ഗ്രസ് അനുകൂല യൂണിയന്‍ ശനിയാഴ്ച രാത്രി വരെയാണ് പ്രഖ്യാപിച്ചിരിക്കുന്നത്. വിവിധ ഡിപ്പോകളില്‍നിന്ന് ഇതുവരെ ചുരുക്കം സര്‍വീസുകള്‍ മാത്രമാണ് നടത്തിയത്. പണിമുടക്കില്‍ ഭൂരിഭാഗം സര്‍വീസുകളും മുടങ്ങിയതോടെ പൊതുജനം വലഞ്ഞു. തിരുവനന്തപുരത്തുനിന്ന് രണ്ട് ദീര്‍ഘദൂര സര്‍വീസുകള്‍ മാത്രമാണ് ഇതുവരെ പുറപ്പെട്ടത്. കോഴിക്കോട്ടുനിന്ന് മൂന്ന് സര്‍വീസുകള്‍ പുറപ്പെട്ടപ്പോള്‍ ജീവനക്കാര്‍ എത്താതിരുന്നതോടെ എറണാകുളം ഡിപ്പോയില്‍നിന്ന് ഒരു സര്‍വീസ് പോലും നടത്തിയില്ല. ഗ്രാമീണ മേഖലകളില്‍ യാത്രാക്ലേശം രൂക്ഷമാണ്. പണി മുടക്കാത്ത ജീവനക്കാരെ ഉപയോഗിച്ച് പരമാവധി സര്‍വീസുകള്‍ നടത്താനാണ് കെഎസ്ആര്‍ടിസി മാനേജ്‌മെന്റിന്റെ ശ്രമം. ഹാജരാകുന്ന ജീവനക്കാരെ ഉപയോഗിച്ച് ഡബിള്‍ ഡ്യൂട്ടി ഉള്‍പ്പെടെ നല്‍കി പരമാവധി ട്രിപ്പുകള്‍ ഉറപ്പാക്കാനാണ് നീക്കം.