അച്ഛന്‍ വഴിയേ മകനും; വെള്ളം കയറിയ വീട്ടിലെത്തി ഉദയനിധി സ്റ്റാലിനും

കനത്ത മഴ ചെന്നൈയെ പ്രതിസന്ധിയിലാക്കുമ്പോള്‍ ഉദ്യോഗസ്ഥര്‍ക്കു നിര്‍ദേശങ്ങള്‍ നല്‍കുന്നതിനപ്പുറം ജനങ്ങളിലേക്ക് ഇറങ്ങിയുള്ള പ്രവര്‍ത്തനമാണ് തമിഴ്‌നാട് സര്‍ക്കാര്‍ നടത്തുന്നത്. മുഖ്യമന്ത്രി എം.കെ.സ്റ്റാലിന്‍ അടക്കം നേരിട്ടെത്തി മുന്നൊരുക്കങ്ങള്‍ക്കു നേതൃത്വം നല്‍കുന്നതാണു കാഴ്ച. അച്ഛന്‍ മാത്രമല്ല മകനും ദുരിതാശ്വാസ പ്രവര്‍ത്തനങ്ങളില്‍ സജീവമാവുകയാണ്. വെള്ളം കയറിയ വീടുകളിലേക്കും നഗരങ്ങളിലേക്കും എത്തി നേരിട്ടു രക്ഷാദൗത്യം നടത്തുകയാണു സ്റ്റാലിന്റെ മകനും നടനും എംഎല്‍എയുമായ ഉദയനിധി സ്റ്റാലിന്‍. വെള്ളം കയറിയ വീട്ടിലേക്ക് എത്തിയ അദ്ദേഹത്തിന്റെ കൈപിടിച്ചു നില്‍ക്കുന്ന ഒരു വയോധികന്റെ ചിത്രവും പുറത്തുവന്നിട്ടുണ്ട്. വെള്ളം പമ്പ് ചെയ്തു കളയാനും, ദുരിതബാധിതര്‍ക്കു ഭക്ഷ്യകിറ്റ് വിതരണം ചെയ്യാനും ഉദയനിധി മുന്നിലുണ്ട്. സ്റ്റാലിന്റെ പിന്‍ഗാമി എന്ന നിലയില്‍ ഇതിനോടകം തമിഴ്‌നാട്ടില്‍ സജീവമാണ് ഉദയനിധി. 2015ല്‍ ചെന്നൈയെ മുക്കിയ പ്രളയത്തിന്റെ ഓര്‍മകളിലാണ് ഇപ്പോള്‍ തമിഴ് ജനത. അത്രമാത്രം മഴയാണു ശനിയാഴ്ച രാത്രി മുതല്‍ പെയ്യുന്നത്. ചെന്നൈയിലെ പല ഭാഗങ്ങളിലും ഇപ്പോള്‍ വെള്ളം കയറി. വരും ദിവസങ്ങളിലും മഴ തുടരുമെന്നാണു കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നത്. ഇതിനു പിന്നാലെ മുഖ്യമന്ത്രി എം.കെ. സ്റ്റാലിന്‍ നേരിട്ടെത്തി രക്ഷാദൗത്യത്തിനും മുന്നൊരുക്കങ്ങള്‍ക്കും നേതൃത്വം നല്‍കുകയാണ്.