പാലാരിവട്ടം അപകടമുണ്ടായത് ബൈക്കില്‍ ഇടിക്കാതിരിക്കാന്‍ കാര്‍ വെട്ടിച്ചപ്പോഴെന്ന് ഡ്രൈവറുടെ മൊഴി

മുന്‍ മിസ് കേരളയടക്കം മൂന്നുപേരുടെ മരണത്തിനിടയാക്കിയ പാലാരിവട്ടം ബൈപ്പാസ് അപകടത്തിലെ പ്രതി അബ്ദുള്‍ റഹ്മാനെ അന്വേഷണ സംഘം ചോദ്യം ചെയ്തു. ചോദ്യം ചെയ്യലിനായി മൂന്നു മണിക്കൂര്‍ വിട്ടു നല്‍കിയപ്പോഴായിരുന്നു നടപടി. തങ്ങളുടെ കാറിനെ ഔഡി കാര്‍ പിന്തുടര്‍ന്ന കാര്യം റഹ്മാന്‍ പോലീസിനെ അറിയിച്ചു. മുന്നില്‍ പോയ ബൈക്കില്‍ ഇടിക്കാതിരിക്കാന്‍ കാര്‍ വെട്ടിച്ചപ്പോഴാണ് അപകടമുണ്ടായതെന്നും പറഞ്ഞു. റഹ്മാന്റെ ആരോഗ്യസ്ഥിതി മോശമാണെന്ന് പ്രതിഭാഗം അറിയിച്ചതിനാല്‍ മൂന്നുമണിക്കൂര്‍ മാത്രം ചോദ്യം ചെയ്യാനാണ് കോടതി അനുവദിച്ചത്. നിശാ പാര്‍ട്ടിയില്‍ പങ്കെടുത്തവര്‍ ആരെല്ലാം, നിശാ പാര്‍ട്ടിയില്‍ എന്താണ് നടന്നത്, അപകടത്തിലേക്ക് നയിച്ച സാഹചര്യങ്ങളെന്തായിരുന്നു, ആരാണ് കാറിനെ പിന്തുടര്‍ന്നത്, വഴിമധ്യേ വാഹനം നിര്‍ത്തി പിന്തുടര്‍ന്നവരോട് എന്താണ് സംസാരിച്ചത് എന്നെല്ലാം പോലീസ് അന്വേഷിച്ചു. ഇതിനെല്ലാം പൂര്‍ണമായും മറുപടി ലഭിച്ചില്ല. മദ്യപിച്ച് വാഹനം ഓടിച്ച് അപകടമുണ്ടാക്കി മൂന്നു പേര്‍ മരിക്കാനിടയാക്കിയതിനാണ് ഇയാളുടെ പേരില്‍ കേസെടുത്തിരിക്കുന്നത്. നവംബര്‍ ഒന്നിന് പുലര്‍ച്ചെ പാലാരിവട്ടം ബൈപ്പാസിലുണ്ടായ അപകടത്തില്‍ മുന്‍ മിസ് കേരള വിജയികളായ ആറ്റിങ്ങല്‍ സ്വദേശിനി അന്‍സി കബീര്‍ (25), തൃശ്ശൂര്‍ സ്വദേശിനി അന്‍ജന ഷാജന്‍ (24) എന്നിവര്‍ സംഭവസ്ഥലത്തുതന്നെ മരിച്ചു. ചികിത്സയിലിരുന്ന തൃശ്ശൂര്‍ സ്വദേശി കെ.എ. മുഹമ്മദ് ആഷിഖ് (25) പിന്നീട് മരിച്ചു. അപകടത്തില്‍പ്പെട്ടവര്‍ ഫോര്‍ട്ട്കൊച്ചിയിലെ നമ്പര്‍ 18 ഹോട്ടലില്‍നിന്ന് നിശാ പാര്‍ട്ടി കഴിഞ്ഞിറങ്ങിയതെന്ന അടിസ്ഥാനത്തില്‍ ഇവിടത്തെ സി.സി.ടി.വി. ദൃശ്യങ്ങള്‍ പോലീസ് പരിശോധിച്ചെങ്കിലും പ്രധാന ദൃശ്യങ്ങള്‍ മാറ്റിയിരുന്നു. ഉടമയുടെ നിര്‍ദേശപ്രകാരം മാറ്റിയെന്നാണ് ഹോട്ടലിലെ ജീവനക്കാരുടെ മൊഴി. ഇതോടെയാണ് കേസില്‍ അട്ടിമറി സാധ്യത പോലീസ് മണത്തത്. പിന്നീട് റോഡിലെ സി.സി.ടി.വി. ദൃശ്യങ്ങള്‍ പരിശോധിച്ചപ്പോഴാണ് ഒരു ഔഡി കാര്‍ അപകടത്തില്‍പ്പെട്ട കാറിനെ പിന്തുടര്‍ന്നത് കണ്ടെത്തിയത്. ഇത് ഓടിച്ചിരുന്ന സൈജുവിനെ പോലീസ് ചോദ്യം ചെയ്തിരുന്നു. സൈജുവും ഹോട്ടലുടമ റോയിയും തമ്മില്‍ ഫോണില്‍ ബന്ധപ്പെട്ടതായും വിവരം ലഭിച്ചിട്ടുണ്ട്. റോയിയെ അന്വേഷണ സംഘം ചൊവ്വാഴ്ച ചോദ്യം ചെയ്‌തേക്കും.