സിറോ മലബാര്‍ സഭയില്‍ കുര്‍ബാന ഏകീകരണം; തീരുമാനത്തിലുറച്ച് കര്‍ദ്ദിനാള്‍ മാര്‍ ജോര്‍ജ്ജ് ആലഞ്ചേരി

സിറോ മലബാര്‍ സഭയില്‍ കുര്‍ബാന പരിഷ്‌കരിക്കുന്നതില്‍ നിലപാടില്‍ ഉറച്ച് കര്‍ദ്ദിനാള്‍ മാര്‍ ജോര്‍ജ്ജ് ആലഞ്ചേരി . തീരുമാനം നേരത്തെ എടുത്തതാണെന്നും ഈമാസം 28 ന് തന്നെ പരിഷ്‌കരിച്ച കുര്‍ബാന നടപ്പിലാക്കുമെന്നും കര്‍ദിനാള്‍ വ്യക്തമാക്കി. ഒരു വിഭാഗം വൈദികരും, വിശ്വാസികളും പ്രക്ഷോഭം ശക്തമാക്കുന്നതിനിടെയാണ് കര്‍ദ്ദിനാള്‍ നിലപാട് പരസ്യമാക്കിയത്. സിറോ മലബാര്‍ സഭയുടെ ആരാധനാവത്സരം ആരംഭിക്കുന്ന നവംബര്‍ 28 ന് സിറോ മലബാര്‍ സഭയിലെ ബസലിക്ക, തീര്‍ത്ഥടാന കേന്ദ്രങ്ങളിലും ഈസ്റ്റര്‍ ദിനത്തില്‍ മറ്റ് ഇടവക പള്ളികളിലും കുര്‍ബാന പരിഷ്‌കാരം നടപ്പാക്കാനാണ് സിനഡ് നല്‍കിയ നിര്‍ദ്ദേശം. ജനാഭിമുഖ കുര്‍ബാന നടക്കുന്ന എറണാകുളം അങ്കമാലി അതിരൂപതയടക്കം തീരുമാനത്തില്‍ കടുത്ത പ്രതിഷേധത്തില്‍ നില്‍ക്കുന്‌പോഴാണ് കര്‍ദ്ദിനാള്‍ നിലപാട് ഒന്നുകൂടി ആവര്‍ത്തിച്ചത്. ആരാധന ക്രമത്തിലെ പരിഷ്‌കാരം വത്തിക്കാന്‍ അനുമതിയോടെയാണ് നടപ്പാക്കുന്നതെന്നാണ് സഭാ നേതൃത്വം പറയുന്നത്. എന്നാല്‍, എറണാകുളം അങ്കമാലി അതിരൂപതയടക്കം 8 ഓളം അതിരൂപതകള്‍ ജനാഭിമുഖ കുര്‍ബാന മാറ്റുന്നതിനെ എതിര്‍ക്കുന്നുണ്ട്. കഴിഞ്ഞ ദിവസം വൈദികരും വിശ്വാസികളും സഭാ ആസ്ഥാനത്തേക്ക് പ്രതിഷേധവുമായി എത്തിയിരുന്നു.