മോഡലുകളുടെ മരണം: ആഡംബരക്കാര്‍ ഓടിച്ച സൈജു മുന്‍കൂര്‍ ജാമ്യം തേടി

ദേശീയപാതാ ബൈപാസില്‍ മോഡലുകള്‍ അപകടത്തില്‍ മരിച്ച സംഭവത്തില്‍, പൊലീസ് ചോദ്യം ചെയ്തു വിട്ടയച്ച ആഡംബരക്കാര്‍ ഡ്രൈവര്‍ സൈജു എം.തങ്കപ്പന്‍ മുന്‍കൂര്‍ ജാമ്യം തേടി ഹൈക്കോടതിയില്‍. മോഡലുകള്‍ അപകടത്തില്‍പെട്ട് മിനിറ്റുകള്‍ക്കുള്ളില്‍ ഇയാള്‍ സംഭവസ്ഥലത്ത് എത്തിയിരുന്നു. ഇവര്‍ ഡിജെ പാര്‍ട്ടിയില്‍ പങ്കെടുത്ത ഹോട്ടല്‍ മുതല്‍ സൈജു വാഹനത്തെ പിന്തുടര്‍ന്നിരുന്നതായാണു വിവരം. മദ്യലഹരിയില്‍ അമിത വേഗത്തില്‍ പോകരുത് എന്നു പറയുന്നതിനാണ് പിന്നാലെ വന്നത് എന്നാണ് സൈജു പൊലീസിനു മൊഴി നല്‍കിയിരിക്കുന്നത്. ഇയാള്‍ക്കെതിരെ അമിത വേഗത്തില്‍ വാഹനം ഓടിച്ചതിനു മാത്രം കേസെടുത്ത് വിട്ടയയ്ക്കുകയായിരുന്നു. കഴിഞ്ഞ ദിവസം ഹോട്ടല്‍ ഉടമ റോയി ജെ.വയലാറ്റിനെ പൊലീസ് അറസ്റ്റു ചെയ്തതോടെയാണ് മുന്‍കൂര്‍ ജാമ്യവുമായി സൈജു ഹൈക്കോടതിയെ സമീപിച്ചത്. സൈജു ഡിജെ പാര്‍ട്ടിയില്‍ പങ്കെടുത്തിട്ടുണ്ട് എന്നും ഹോട്ടലുമായി ബന്ധമുള്ള ആളാണെന്നും കേസ് അന്വേഷിക്കുന്ന ഇന്‍സ്‌പെക്ടര്‍ കെ.അനന്തലാല്‍ വ്യക്തമാക്കിയിട്ടുണ്ട്. ഈ സാഹചര്യത്തില്‍ അറസ്റ്റു സാധ്യത ഭയന്നാണ് മുന്‍കൂര്‍ ജാമ്യത്തിന് കോടതിയില്‍ എത്തിയിരിക്കുന്നത്.