വരുണ്‍ ഗാന്ധി തൃണമൂല്‍ കോണ്‍ഗ്രസിലേക്കെന്ന് സൂചന

ബിജെപി എംപി വരുണ്‍ ഗാന്ധി തൃണമൂല്‍ കോണ്‍ഗ്രസില്‍ ചേര്‍ന്നേക്കുമെന്ന് സൂചന. ടുത്ത ആഴ്ച ഡല്‍ഹിയില്‍ എത്തുന്ന മമത ബാനര്‍ജിയുമായി വരുണ്‍ ചര്‍ച്ച നടത്തുമെന്നാണ് റിപ്പോര്‍ട്ട്. ബിജെപിയില്‍ നിന്നടക്കം നിരവധി നേതാക്കളുമായി ചര്‍ച്ചകള്‍ നടന്നു വരുന്നതായി തൃണമൂല്‍ കേന്ദ്രങ്ങള്‍ അറിയിച്ചു.പ്രതിപക്ഷ സഖ്യം കെട്ടിപ്പടുക്കുക, ഒപ്പം പാര്‍ട്ടി വളര്‍ത്തുക- ഈ രണ്ട് അജണ്ടകളിലാണ് മമത ബാനര്‍ജിയുടെ ഡല്‍ഹി സന്ദര്‍ശനം. ഇതോടെയാണ് ബിജെപി എംപി വരുണ്‍ ഗാന്ധി തൃണമൂലില്‍ ചേര്‍ന്നേക്കും എന്ന അഭ്യൂഹങ്ങള്‍ ശക്തമായത്. ബിജെപി വിടാന്‍ മാനസികമായി തയ്യാറെടുത്തു കഴിഞ്ഞെന്ന നിലയിലാണ് കഴിഞ്ഞ ദിവങ്ങളില്‍ വന്ന വരുണ്‍ ഗാന്ധിയുടെ പ്രതികരണങ്ങള്‍. അമ്മ മേനക ഗാന്ധിയുടെ ശക്തമായ എതിര്‍പ്പുള്ളതിനാല്‍ , കോണ്‍ഗ്രസ്സിലേക്ക് പോകുന്നത് വരുണിന് ചിന്തിക്കാനാകില്ല. ഈ സാഹചര്യത്തില്‍ തൃണമൂല്‍ തന്നെയാണ് വരുണിനു മുന്നിലുള്ള മികച്ച സാധ്യത. ഇക്കാര്യത്തില്‍ തൃണാമൂല്‍ നേതൃത്വമോ വരുണ്‍ ഗാന്ധിയോ പരസ്യമായി പ്രതികരിച്ചിട്ടില്ല. എന്നാല്‍ സുപ്രധാന സംഭവങ്ങള്‍ മമതയുടെ സന്ദര്‍ശനത്തില്‍ ഉണ്ടാകുമെന്ന് തൃണാമൂല്‍ കേന്ദ്രങ്ങള്‍ അറിയിച്ചു.ബിഎസ്പി എംപി കുന്‍വര്‍ ഡാനിഷ് അലിയാണ് , തൃണമൂല്‍ പട്ടികയിലുള്ള മറ്റൊരു പേര്. ജെഡിഎസ് വിട്ടെത്തിയ ഡാനിഷ് അലിയുമായി മായവതി ഇപ്പോള്‍ നല്ല ബന്ധത്തിലല്ല.മുതിര്‍ന്ന നേതാക്കളെ കൊണ്ട് വരുന്നതിലൂടെ ഡല്‍ഹിയില്‍ പാര്‍ട്ടിക്ക് മേല്‍വിലാസം ഉണ്ടാക്കാനാണ് തൃണമൂല്‍ ലക്ഷ്യം വക്കുന്നത്.പ്രതിപക്ഷ ഐക്യം സംബന്ധിച്ച് കോണ്ഗ്രസ് നേതാക്കളുമായി മമത കൂടിക്കാഴ്ച നടത്തുമോ എന്ന കാര്യം ഇതുവരെ നിശ്ചയിച്ചിട്ടിലെന്നും തൃണമൂല്‍ കേന്ദ്രങ്ങള്‍ അറിയിച്ചു.