‘ തിരപോലൊരാള്‍ ‘ സഖാവ് ഇ.കെ ഇമ്പിച്ചിബാവയുടെ ജീവിതത്തെ ആസ്പദമാക്കി ഡോക്യുമെന്ററി

സഖാവ് ഇ.കെ ഇമ്പിച്ചിബാവയുടെ ജീവിതത്തെ ആസ്പദമാക്കി CPI(M) പൊന്നാനി ഏരിയാ കമ്മിറ്റി പുറത്തിറക്കിയ ' തിരപോലൊരാള്‍ ' എന്ന പേരിലുള്ള ഡോക്യുമെന്ററി ബഹു. സ്പീക്കർ ശ്രീ . എം. ബി രാജേഷ് സിനിമാ സംവിധായകന്‍ സലാം ബാപ്പുവിന് നല്‍കി പ്രകാശനം ചെയ്തു . 'ഒരു സാധാരണക്കാരന് എങ്ങനെ ഒരു ഭരണാധികാരിയാകാന്‍ കഴിയുമെന്നും ഒരു ഭരണാധികാരിക്ക് എങ്ങനെ ഒരു സാധാരണക്കാരനാകാന്‍ കഴിയുമെന്നും ' ജീവിതം കൊണ്ട് തെളിയിച്ചു കാണിച്ച ജനകീയനായ നേതാവ് കൂടിയാണ് സഖാവ് ഇ.കെ. ഇമ്പിച്ചിബാവ . അത് കൊണ്ടു കൂടിയാണ് സഖാവിനെ ' പാവങ്ങളുടെ സുല്‍ത്താന്‍ ' എന്ന് പ്രായഭേദമന്യേ എല്ലാവരും സ്‌നേഹത്തോടെ വിളിച്ചിരുന്നത് .വിദ്യാര്‍ത്ഥി പ്രസ്ഥാനത്തിന്റെ സംസ്ഥാന ഭാരവാഹിയായി പ്രവര്‍ത്തിക്കുന്ന കാലം മുതല്‍ ദേശീയ സ്വാതന്ത്യ സമരത്തിലും വളരെ സജീവമായിരുന്നു ഇമ്പിച്ചിബാവ .മുഹമ്മദ് അബ്ദുറഹ്മാന്‍ സാഹിബ് , സ : കൃഷ്ണപിള്ള ,സ : എ.കെ.ജി , സ : ഇ.എം.എസ് എന്നിവരുമായുള്ള ആഴത്തിലുള്ള അടുപ്പം സഖാവിലെ പോരാളിയെ രൂപപ്പെടുത്തുന്നതില്‍ നിര്‍ണായകമായ പങ്കു വഹിച്ചു . അവിഭക്ത കമ്യൂണിസ്റ്റ് പാര്‍ട്ടിയുടെ ദേശീയ കൗണ്‍സില്‍ അംഗം , രാജ്യസഭാ എം.പി ,ലോക്സഭാ എം.പി , എം.എല്‍.എ , ഗതാഗത മന്ത്രി , CPI(M) സ്ഥാപക നേതാക്കളില്‍ ഒരാള്‍ , CPI(M) പാലക്കാട് - മലപ്പുറം ജില്ലാ സെക്രട്ടറി , CPI(M) സംസ്ഥാന കമ്മിറ്റി അംഗം , സിഐടിയു സംസ്ഥാന ഭാരവാഹി എന്നീ നിലകളിലെല്ലാം തന്റെ അവസാനശ്വാസം നിലക്കും വരെ കര്‍മനിരതനായി സഖാവ് പ്രവര്‍ത്തിച്ചു . നിയമത്തിന്റെ നൂലമാലകളില്‍പ്പെട്ട് പൊതുജനങ്ങള്‍ കഷ്ടപ്പെടരുതെന്ന വാശി ജീവിതാവസാനം വരെ സഖാവിനുണ്ടായിരുന്നു . ഏത് പ്രതിസന്ധികളേയും തരണം ചെയ്ത് ജനപക്ഷ വികസനം നടപ്പിലാക്കാനും ജനവിരുദ്ധ നയങ്ങള്‍ തിരുത്തിക്കാനും സഖാവിനുണ്ടായിരുന്ന കാര്യക്ഷമതയും പ്രായോഗികതയും വേറിട്ടതായിരുന്നു .ഒരായുസ്സ് മുഴുവന്‍ നാടിനും ജനങ്ങള്‍ക്കും ജനപക്ഷ നിലപാടുകള്‍ക്കുമായി മാറ്റിവെച്ച പ്രിയ സഖാവിന്റെ കര്‍മപഥങ്ങള്‍ രേഖപ്പെടുത്തിയതാണ്‌ ഈ ഡോക്യുമെന്ററി. ഡോക്യുമെന്ററിയുടെ രചന നിര്‍വഹിച്ചത് CPI(M) പൊന്നാനി ഏരിയാ സെക്രട്ടറി സ : പി.കെ. ഖലീമുദ്ദീന്‍ സംവിധാനം നിര്‍വഹിച്ച മുന്‍ SFI നേതാവും മാധ്യമ പ്രവര്‍ത്തകനുമായ പി.കെ ശ്യാം കൃഷ്ണന്‍. സംഗീതം ബിജിബാല്‍,ഗാനരചന കവി റഫീഖ് അഹമ്മദ് എന്നിവരാണ് .