ബി.ജെ.പി.യില്‍ നേതാക്കള്‍ക്ക് പ്രോഗ്രസ് കാര്‍ഡ്; പാര്‍ട്ടിപരിപാടികളില്‍ പങ്കെടുക്കാത്തവര്‍ പുറത്താകും

ബി.ജെ.പി.യില്‍ താഴേത്തട്ടുമുതല്‍ ഭാരവാഹികളുടെ പ്രവര്‍ത്തനം വിലയിരുത്തുന്ന സംവിധാനം വരുന്നു. സംഘടനാസംവിധാനം ശക്തമാക്കാനാണിത്. ബൂത്ത്, പഞ്ചായത്തുതലം മുതല്‍ സംസ്ഥാനതലംവരെ പാര്‍ട്ടി നേതാക്കളുടെ പ്രവര്‍ത്തനം മേല്‍ഘടകങ്ങള്‍ വിലയിരുത്തും. നേതാക്കള്‍ തങ്ങളുടെ ചുമതലകള്‍ നിര്‍വഹിക്കുന്നുണ്ടോയെന്നാണ് പ്രധാനമായും ശ്രദ്ധിക്കുക. തുടര്‍ച്ചയായി പാര്‍ട്ടി പരിപാടികളില്‍നിന്ന് വിട്ടുനില്‍ക്കുന്നവരെ ഭാരവാഹിത്വത്തില്‍നിന്ന് ഒഴിവാക്കും. മൂന്നുതവണ തുടര്‍ച്ചയായി പങ്കെടുക്കാത്തവരെയാണ് ഒഴിവാക്കുക. ചേരിപ്പോരും നേതാക്കളുടെ പടലപ്പിണക്കവും നിലനില്‍ക്കുന്ന സംസ്ഥാന ഘടകത്തില്‍ നേതൃത്വത്തോട് ഇടഞ്ഞ് ചിലര്‍ പാര്‍ട്ടിപരിപാടികളില്‍നിന്ന് വിട്ടുനില്‍ക്കുന്നുണ്ട്. അടുത്ത ലോക്സഭാ തിരഞ്ഞെടുപ്പിന് മുന്‍പ് സംഘടനാ ദൗര്‍ബല്യങ്ങള്‍ നീക്കുകയാണ് ലക്ഷ്യം. സാമൂഹികമാധ്യമങ്ങളില്‍ നേതാക്കളുടെ ഇടപെടല്‍ നിരീക്ഷിക്കും. വിവിധവിഷയങ്ങളില്‍ പാര്‍ട്ടിയുടെ പ്രഖ്യാപിത നയങ്ങള്‍ക്ക് വിരുദ്ധമായി നേതാക്കള്‍ സാമൂഹിക മാധ്യമങ്ങളില്‍ അഭിപ്രായം പ്രകടിപ്പിക്കുന്നത് തടയുകയാണ് ഉദ്ദേശം. സംഘടനാസംവിധാനം ശക്തിപ്പെടുത്തുന്നതിന് ബി.ജെ.പി. സംസ്ഥാനത്ത് വിവിധതരത്തിലുള്ള അഴിച്ചുപണികള്‍ നടത്തുന്നുണ്ട്. നിയോജകമണ്ഡലം കമ്മിറ്റികള്‍ വിഭജിച്ച് രണ്ട് മണ്ഡലം കമ്മിറ്റികളാക്കുകയാണ്. അടുത്തഘട്ടമായി പഞ്ചായത്ത്, ബൂത്ത് കമ്മിറ്റികള്‍ പുനഃസംഘടിപ്പിക്കും. പഞ്ചായത്ത്, ബൂത്ത്, മണ്ഡലം നേതൃതലങ്ങളില്‍ സ്ത്രീപ്രാതിനിധ്യം കൂട്ടും. പിന്നോക്കസമുദായങ്ങളില്‍നിന്നും ന്യൂനപക്ഷ വിഭാഗങ്ങളില്‍നിന്നും കൂടുതല്‍പേരെ ഭാരവാഹികളാക്കാനും നിര്‍ദേശമുണ്ട്.