തൃക്കാക്കര നഗരസഭാ യോഗത്തിലെ കൂട്ടയടി: കോണ്‍ഗ്രസ് കൗണ്‍സിലര്‍ അറസ്റ്റില്‍

തൃക്കാക്കര നഗരസഭാ യോഗത്തില്‍ കൂട്ടയടി നടന്ന സംഭവത്തില്‍ കോണ്‍ഗ്രസ് കൗണ്‍സിലറും പാര്‍ട്ടി മണ്ഡലം പ്രസിഡന്റുമായ സി.സി.വിജുവിനെ പൊലീസ് അറസ്റ്റു ചെയ്തു. ഇന്നു പുലര്‍ച്ചെ വീട്ടിലെത്തിയാണ് അറസ്റ്റു ചെയ്തത്. മറ്റു കൗണ്‍സിലര്‍മാരുടെ വീടുകളില്‍ പൊലീസ് എത്തിയെങ്കിലും ഇവരെ പിടികൂടാനായില്ല. സംഭവത്തില്‍ കൗണ്‍സിലറും സിപിഐ മണ്ഡലം അസിസ്റ്റന്റ് സെക്രട്ടറിയുമായ എം.ജെ.ഡിക്‌സനെയും അറസ്റ്റു ചെയ്തിട്ടുണ്ട്. അറസ്റ്റു ഭയന്ന് പലരും മുങ്ങിയതായാണ് വിവരം. പണക്കിഴി വിവാദത്തെ തുടര്‍ന്ന് നഗരസഭാ അധ്യക്ഷയുടെ കുത്തിത്തുറന്ന ചേംബര്‍ നന്നാക്കിയതിന്റെ ചെലവിനെ ചൊല്ലിയുള്ള തര്‍ക്കമാണ് ഇന്നലെ കൂട്ടത്തല്ലില്‍ കലാശിച്ചത്. സംഭവത്തില്‍ നഗരസഭാ അധ്യക്ഷ അജിത തങ്കപ്പന്‍ ഉള്‍പ്പടെ ആറു കൗണ്‍സിലര്‍മാര്‍ ആശുപത്രിയില്‍ അഡ്മിറ്റായിരുന്നു. ചേംബറിന്റെ ചെലവ് അതു കുത്തിപ്പൊളിച്ചവരില്‍നിന്ന് ഈടാക്കണം എന്നായിരുന്നു പ്രതിപക്ഷ ആവശ്യം. ഇതിനെ യുഡിഎഫിലെ കൗണ്‍സിലര്‍മാര്‍ കൂടി പിന്തുണച്ചതോടെ രംഗം വഷളാകുകയായിരുന്നു. ലീഗ് അംഗങ്ങളും പിന്തുണച്ചതോടെ എതിര്‍ ചേരിയിലെ അംഗസംഖ്യ ഉയര്‍ന്നു. ഇതിനിടെ അജണ്ട പാസാക്കിയെന്ന അധ്യക്ഷയുടെ പ്രഖ്യാപനം പ്രകോപനമുണ്ടാക്കുകയായിരുന്നു. പ്രതിപക്ഷം അധ്യക്ഷയുടെ അടുത്തേക്കു പാഞ്ഞു ചെല്ലുകയും ഭരണപക്ഷം ഇവരെ പ്രതിരോധിക്കുകയും ചെയ്തു. ഇതിനിടെ അജിത തങ്കപ്പന്‍ പുറത്തേക്കു പോകാന്‍ ഇറങ്ങിയപ്പോള്‍ തടയുകയും സംഘര്‍ഷം മുറുകുകയുമായിരുന്നു. പിടിവലിയില്‍ പ്രതിപക്ഷത്തെ അജുന ഷാഹിമ്മിന്റെ സാരി കീറി. കൈയ്ക്കും പരുക്കേറ്റു. ഇതിനിടെ പൊലീസും സംഭവ സ്ഥലത്തെത്തി. പരുക്കേറ്റവരെ വിവിധ ആശുപത്രികളില്‍ പ്രവേശിപ്പിച്ചു.