സന്ദീപിന്റെ കൊലയാളികള്‍ കട കത്തിക്കുമെന്ന് ഭീഷണിപ്പെടുത്തി; വെളിപ്പെടുത്തി ഉടമ

തിരുവല്ലയില്‍ സിപിഎം നേതാവ് സന്ദീപ് കുമാറിനെ ആക്രമിച്ച ശേഷം ഗുണ്ടാ സംഘം സമീപത്തെ കടയിലും ഭീകരാന്തരീക്ഷമുണ്ടാക്കി. സന്ദീപിനും സുഹൃത്തുക്കള്‍ക്കും സാധനങ്ങള്‍ നല്‍കിയാല്‍ കട കത്തിക്കുമെന്നായിരുന്നു ഭീഷണിയെന്ന് കടയുടമ ഗ്രേസിക്കുട്ടി പറഞ്ഞു. 'മൂന്നു പേരാണ് കയ്യില്‍ കത്തിയുമായി ഭീഷണിപ്പെടുത്താന്‍ വന്നത്. ഞങ്ങള്‍ അവരെ നേരത്തെ കണ്ടിട്ടില്ല. സന്ദീപും കൂട്ടുകാരെയും കടയില്‍ കയറ്റരുതെന്നു പറഞ്ഞായിരുന്നു ഭീഷണി. സന്ദീപും സുഹൃത്തുക്കളും സ്ഥിരമായി കടയില്‍ വന്നിരിക്കുന്നതാണ്. ഇന്നലെ പകലെപ്പോഴോ സന്ദീപ് വന്നിരുന്നു. ഭീഷണിപ്പെടുത്താന്‍ വന്നവര്‍ പോയിക്കഴിഞ്ഞ് ഒരാള്‍ വന്നു പറഞ്ഞപ്പോഴാണ് സന്ദീപിനെ കുത്തിയെന്ന് അറിഞ്ഞത്. ഞങ്ങള്‍ക്ക് എന്താവശ്യമുണ്ടെങ്കിലും ഓടി വരുന്ന ആളായിരുന്നു സന്ദിപ്. അതിനെയാണ് ഇവര്‍ ഇല്ലാതാക്കിയത്'- കടയുടമയുടെ വാക്കുകള്‍. അതേസമയം, തിരുവല്ലയില്‍ ഇന്നല രാത്രി സിപിഎം നേതാവ് പി.ബി.സന്ദീപ് കുമാറിനെ വെട്ടിക്കൊലപ്പെടുത്തിയ കേസില്‍ നാലു പ്രതികള്‍ പിടിയില്‍. ചാത്തങ്കരി സ്വദേശി ജിഷ്ണു, പായിപ്പാട് സ്വദേശി പ്രമോദ്, വേങ്ങല്‍ സ്വദേശി നന്ദു, കണ്ണൂര്‍ സ്വദേശി ഫൈസി എന്നിവാരാണ് പിടിയിലായത്. വേങ്ങല്‍ സ്വദേശി അഭിക്കായി തിരച്ചില്‍ തുടരുന്നു. പ്രതി ജിഷ്ണുവിന് സന്ദീപിനോടുള്ള വ്യക്തിവിരോധമാണ് കൊലയ്ക്ക് കാരണമെന്ന് പൊലീസ് പറഞ്ഞു.