മഹാരാഷ്ട്രയിലും ഒരാള്‍ക്ക് ഒമിക്രോണ്‍; രാജ്യത്ത് രോഗ ബാധിതരുടെ എണ്ണം നാല്

മഹാരാഷ്ട്രയിലും ഒരാള്‍ക്ക് കൊവിഡ് വകഭേദമായ ഒമിക്രോണ്‍ സ്ഥിരീകരിച്ചു. ആഫ്രിക്കയില്‍ നിന്ന് എത്തിയ താനെ ഡോംബിവാലി സ്വദേശിക്കാണ് രോഗം സ്ഥിരീകരിച്ചത്. ഇതോടെ രാജ്യത്ത് അതിവ്യാപന ശേഷിയുളള ഒമിക്രോണ്‍ ബാധിക്കുന്നവരുടെ എണ്ണം നാലായി. ഇതുവരെ റിപ്പോര്‍ട്ട് ചെയ്ത കേസുകളില്‍ ഒന്ന് ഗുജറാത്തിലും രണ്ട് ഒമിക്രോണ്‍ കേസുകള്‍ ബംഗളൂരുവിലുമാണ്. ഗുജറാത്തിലെ ജംനഗര്‍ സ്വദേശിക്ക് ഇന്നാണ് ഒമിക്രോണ്‍ സ്ഥിരീകരിച്ചത്. 66 കാരനായ ദക്ഷിണാഫ്രിക്കന്‍ പൗരനും ബംഗളൂരുവിലെ സ്വകാര്യ ആശുപത്രിയിലെ ഡോക്ടറായ 46 കാരനുമാണ് ബംഗളൂരുവില്‍ രോഗം സ്ഥിരീകരിച്ചത്. കഴിഞ്ഞ മാസമാണ് ദുബായ് വഴി ദക്ഷിണാഫ്രിക്കന്‍ പൗരന്‍ ബഗളൂരുവിലെത്തുന്നത്. അതേസമയം, ബംഗളൂരില്‍ ഒമിക്രോണ്‍ സ്ഥിരീകരിച്ച ഡോക്ടര്‍ വിദേശ യാത്ര നടത്തിയിട്ടില്ല. ഇരുവരും രണ്ട് ഡോസ് വാക്സിന്‍ സ്വീകരിച്ചിരുന്നവരാണ്. രണ്ടുപേര്‍ക്ക് ചെറിയ തോതിലുള്ള രോഗലക്ഷണമേ ഉള്ളൂ. വിദേശ യാത്ര നടത്തിയിട്ടില്ലാത്ത ഡോക്ടര്‍ക്ക് ഒമിക്രോണ്‍ സ്ഥിരീകരിച്ചത് ആശങ്കയുണ്ടാക്കുന്നതാണ്. രാജ്യത്ത് ഒമിക്രോണ്‍ വ്യാപനം നടന്നു കൊണ്ടിരിക്കുകയാണെന്ന സൂചനയാണ് ഇത് നല്‍കുന്നതെന്ന് ആരോഗ്യ പ്രവര്‍ത്തകര്‍ പറയുന്നു. ഡോക്ടറുടെ യാത്രാ പശ്ചാത്തലം സംബന്ധിച്ച് കൂടുതല്‍ അന്വേഷണം നടത്തും.