സന്ദീപ് വധം; ആര്‍എസ്എസുകാര്‍ക്ക് വേണ്ടി തീരുമാനിച്ച അഭിഭാഷകനൊപ്പം സുരേന്ദ്രന്‍ ശബരിമലയില്‍

പെരിങ്ങര സിപിഐഎം ലോക്കല്‍ സെക്രട്ടറി സന്ദീപ് കുമാറിനെ വെട്ടിക്കൊലപ്പെടുത്തിയ ആര്‍എസ്എസുകാരെ സംരക്ഷിക്കാന്‍ തീരുമാനിച്ചിരുന്ന അഭിഭാഷകനൊപ്പം ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ ശബരിമലയില്‍. ദേശാഭിമാനി ദിനപത്രമാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. തിങ്കളാഴ്ച പന്തളത്ത് നിന്നാണ് തിരുവന്‍ വണ്ടൂര്‍ സ്വദേശിയായ അഭിഭാഷകന്‍ ബിജെപി നേതാക്കള്‍ക്കൊപ്പം ശബരിമലയില്‍ എത്തിയത്. സന്ദീപിനെ കൊലപ്പെടുത്തിയ ശേഷം പ്രതികള്‍ക്ക് അഭയം നല്‍കാന്‍ ബിജെപി നിശ്ചയിച്ചിരുന്ന വ്യക്തിയാണ് അഭിഭാഷകനെന്ന് റിപ്പോര്‍ട്ടില്‍ പറയുന്നു. കേസിലെ അഞ്ചാംപ്രതി അഭിജിത്തിന്റെ ഫോണ്‍ സംഭാഷണത്തില്‍ നിന്നാണ് പൊലീസ് അഭിഭാഷകനെ തിരിച്ചറിഞ്ഞത്. ഇതിന്റെ അടിസ്ഥാനത്തില്‍ അഭിഭാഷകന്റെ വീട്ടിലും ഓഫീസിലും നിരീക്ഷണം നടത്തിയിരുന്നെന്നും റിപ്പോര്‍ട്ടില്‍ പറയുന്നു. കൊലയ്ക്ക് ശേഷം ഡമ്മി പ്രതികളെ ചേര്‍ത്ത് കേസ് നടത്താന്‍ തീരുമാനിച്ചതും ഈ അഭിഭാഷകന്റെ ഉപദേശത്തെ തുടര്‍ന്നാണെന്നും ദേശാഭിമാനി പറയുന്നു. അതേസമയം, സന്ദീപ് വധക്കേസില്‍ പ്രതികളെ കൊലപാതകം നടത്തിയ സ്ഥലത്തെത്തിച്ച് പൊലീസ് തെളിവെളുപ്പ് നടത്തി. കൊലപാതകം നടത്തിയ സ്ഥലം ഒന്നാം പ്രതി ജിഷ്ണു പൊലീസ് ഉദ്യോസ്ഥരോട് വ്യക്തമാക്കി. കനത്ത സുരക്ഷയിലാണ് പ്രതികളെ തെളിവെടുപ്പിന് എത്തിച്ചത്. തെളിവെടുപ്പിനിടെ നാട്ടുകാര്‍ പ്രതികള്‍ക്കെതിരെ രോഷാകുലരായതോടെ പൊലീസ് ഏറെ തെളിവെടുപ്പ് നടത്തി പ്രതികളുമായി മടങ്ങിയത്.