മുല്ലപ്പെരിയാറിന്റെ ഏഴു ഷട്ടറുകള്‍ ഉയര്‍ത്തി; 5554 ഘനയടി വെള്ളം പുറത്തേക്ക്

മുല്ലപ്പെരിയാര്‍ ഡാമില്‍ രണ്ടു ഷട്ടറുകള്‍ കൂടി ഉയര്‍ത്തി. ഇതോടെ ആകെ ഏഴു ഷട്ടറുകളാണ് 60 സെന്റിമീറ്റര്‍ ഉയര്‍ത്തിയിരിക്കുന്നത്. 5554 ഘനയടി വെള്ളം പുറത്തേക്കു ഒഴുക്കുന്നു. നേരത്തേ, തുറന്നിരിക്കുന്ന അഞ്ചു ഷട്ടറുകള്‍ 60 സെന്റിമീറ്റര്‍ അധികമുയര്‍ത്തി, 3948 ഘനയടി വെള്ളം പുറത്തേക്കൊഴുക്കിയിരുന്നു. അതേസമയം, മുല്ലപ്പെരിയാര്‍ അണക്കെട്ടില്‍നിന്നു മുന്നറിയിപ്പില്ലാതെ അര്‍ധരാത്രിയില്‍ വെള്ളം തുറന്നു വിടുന്നതിനെതിരെ കേരളം ഇന്നു സുപ്രീം കോടതിയെ സമീപിക്കും. തമിഴ്‌നാടിന്റെ ഏകപക്ഷീയ നടപടി തടയണമെന്നാവശ്യപ്പെട്ടും ഇക്കാര്യത്തില്‍ അടിയന്തര ഇടപെടല്‍ അഭ്യര്‍ഥിച്ചുമാണ് ഇന്നു പ്രത്യേക ഹര്‍ജി നല്‍കുന്നതെന്നു ജലവിഭവ മന്ത്രി റോഷി അഗസ്റ്റിന്‍ ട്വിറ്ററില്‍ കുറിച്ചു.