പുനഃസംഘടന ഗ്രൂപ്പ് സംരക്ഷിക്കാനെന്ന് ആക്ഷേപം; ബി.ജെ.പി.യില്‍ അതൃപ്തി പുകയുന്നു

നാഷണല്‍ കൗണ്‍സിലും സംസ്ഥാന കമ്മിറ്റിയും പുനഃസംഘടിപ്പിച്ചപ്പോള്‍ മുതിര്‍ന്ന നേതാക്കളെ ഒഴിവാക്കിയതില്‍ ബി.ജെ.പി.യില്‍ അതൃപ്തി. ഒ. രാജഗോപാലിനെ ഒരുസമിതിയിലും പരിഗണിച്ചില്ല. കോര്‍കമ്മിറ്റിയില്‍ തുടരുന്നുണ്ടെന്നു മാത്രം. പുനഃസംഘടന ഗ്രൂപ്പുകാരെ സംരക്ഷിക്കാനാണെന്നും കമ്മിറ്റികളില്‍ ഔദ്യോഗിക പക്ഷത്തിന്റെ ഭൂരിപക്ഷം ഉറപ്പാക്കാനാണെന്നും കൃഷ്ണദാസ് പക്ഷത്തെ നേതാവ് പ്രതികരിച്ചു. പി.കെ. കൃഷ്ണദാസിനെ അനുകൂലിക്കുന്നവരെ വെട്ടിനിരത്തിയുള്ള പുനഃസംഘടനയാണ് ഇപ്പോള്‍ നടക്കുന്നതെന്നാണ് ആരോപണം. പുനഃസംഘടനയ്‌ക്കെതിരേ സംസ്ഥാന സമിതിയില്‍നിന്ന് ഒഴിവാക്കപ്പെട്ട പി.ആര്‍. ശിവശങ്കര്‍ പരസ്യമായി രംഗത്തെത്തി. രാജഗോപാല്‍, ശിവശങ്കര്‍, ഏറ്റുമാനൂര്‍ രാധാകൃഷ്ണന്‍ തുടങ്ങിയവരെ സംസ്ഥാന സമിതിയിലോ നാഷണല്‍ കൗണ്‍സിലിലോ ഉള്‍െപ്പടുത്തിയില്ല. പ്രായത്തിന്റെ പേരുപറഞ്ഞാണ് രാജഗോപാലിനെ ഒഴിവാക്കിയതെങ്കില്‍ അദ്ദേഹത്തെക്കാള്‍ തീരേ ആരോഗ്യക്കുറവുള്ളവരെ സമിതികളില്‍ ഉള്‍പ്പെടുത്തിയിട്ടുണ്ടെന്ന് നേതാക്കള്‍ പറയുന്നു. രാജഗോപാലിനെ ആദ്യം നാഷണല്‍ എക്‌സിക്യുട്ടീവില്‍നിന്നും പിന്നീട് കൗണ്‍സിലില്‍നിന്നും ഒഴിവാക്കി. ഇതോടെ മുന്‍പ്രസിഡന്റെന്ന നിലയില്‍ കോര്‍ കമ്മിറ്റിയംഗം മാത്രമായി രാജഗോപാല്‍. സംസ്ഥാന ഘടകത്തിന്റെ തീരുമാനം അതേപടി അംഗീകരിക്കുന്ന സമീപനമാണ് കേന്ദ്രനേതൃത്വം സ്വീകരിക്കുന്നത്. 'വിഷമിച്ചു മരിക്കാനൊന്നും എന്നെക്കിട്ടില്ല. കാലണ മെമ്പറായിട്ടാണെങ്കിലും ഈ പാര്‍ട്ടിയില്‍ കാണും. ഒരു കേന്ദ്രസര്‍ക്കാര്‍ പോസ്റ്റും വേണ്ട. ഇനി ഒരു പഞ്ചായത്ത് തിരഞ്ഞെടുപ്പില്‍പോലും മത്സരിച്ചില്ലെങ്കിലും സംഘടനാ ഉത്തരവാദിത്വം കിട്ടിയില്ലെങ്കിലും നാട്ടിലെ ഏതുനീതികേടിനെയും അപചയങ്ങളെയും പറ്റാവുന്ന രീതിയില്‍ ഇനിയും ചോദ്യംചെയ്യു'മെന്നാണ് സംസ്ഥാന സമിതിയില്‍നിന്ന് ഒഴിവാക്കപ്പെട്ട ശിവശങ്കര്‍ സാമൂഹികമാധ്യമത്തില്‍ കുറിച്ചത്.