മക്കള്‍ക്ക് വിലയിട്ട സംഭവം: പോലീസിനെതിരേ ക്രിമിനല്‍ കേസ് സാധ്യത പരിശോധിച്ച് ഹൈക്കോടതി

മക്കളെ കേസില്‍ കുടുക്കാതിരിക്കുന്നതിന് ഡല്‍ഹി സ്വദേശിനിയായ അമ്മയോട് അഞ്ച് ലക്ഷം രൂപ കൈക്കൂലി ആവശ്യപ്പെട്ട സംഭവത്തില്‍ ആരോപണ വിധേയനായ എ.എസ്.ഐ. അടക്കമുള്ള ഉദ്യോഗസ്ഥര്‍ക്കെതിരേ ക്രിമിനല്‍ കേസ് ചാര്‍ജ് ചെയ്യുന്നതിന്റെ സാധ്യത ഹൈക്കോടതി പരിശോധിക്കും. ഇതിനായി അമിക്കസ് ക്യൂറിയായി അഭിഭാഷകരായ എസ്. രാജീവ്, എ.വി. ജോജോ എന്നിവരെ ഹൈക്കോടതി നിയമിച്ചു. ഡല്‍ഹിയിലേക്കു പോയ പെണ്‍കുട്ടികളില്‍നിന്ന് എ.എസ്.ഐ. 25,000 രൂപ വാങ്ങിയെന്ന് സിറ്റി പോലീസ് കമ്മിഷണറുടെ റിപ്പോര്‍ട്ടിലുണ്ട്. ഇതിന്റെ അടിസ്ഥാനത്തില്‍ ഉദ്യോഗസ്ഥനെതിരേ ക്രിമിനല്‍ കേസ് ചാര്‍ജ് ചെയ്യാനാകില്ലേയെന്ന് ഹര്‍ജി പരിഗണിച്ച ജസ്റ്റിസ് ദേവന്‍ രാമചന്ദ്രന്‍ ആരാഞ്ഞു. പരാതിയില്ലാതെ റിപ്പോര്‍ട്ടിന്റെ മാത്രം അടിസ്ഥാനത്തില്‍ കേസ് ചാര്‍ജ് ചെയ്യാനാകില്ലെന്ന് സര്‍ക്കാരിനായി ഹാജരായ അസിസ്റ്റന്റ് പബ്ലിക് പ്രോസിക്യൂട്ടര്‍ പി. നാരായണന്‍ വിശദീകരിച്ചു. തുടര്‍ന്നാണ് ഇക്കാര്യം പരിശോധിക്കുന്നതിനായി കോടതി അമിക്കസ് ക്യൂറിയെ നിയോഗിച്ചത്. ഹര്‍ജി ജനുവരി ആദ്യം വീണ്ടും പരിഗണിക്കും. പെണ്‍കുട്ടികളുടെ കൈവശം ഉണ്ടായിരുന്ന 25,000 രൂപ താമസച്ചെലവിനും മറ്റുമെന്ന പേരിലാണ് പോലീസ് വാങ്ങിയത്. ഇതില്‍ 17,000 രൂപ റിക്കവര്‍ ചെയ്തതായും കമ്മിഷണറുടെ റിപ്പോര്‍ട്ടിലുണ്ട്. തുടര്‍ന്നാണ് ഇതിന്റെ പേരില്‍ പോലീസ് ഉദ്യോഗസ്ഥര്‍ക്കെതിരേ പിടിച്ചുപറിക്ക് കേസെടുക്കാനാകില്ലേയെന്ന് കോടതി ആരാഞ്ഞത്.ട്രെയിനില്‍ ഡല്‍ഹിക്കു പോയ പെണ്‍കുട്ടികള കണ്ടെത്താനായി പരാതിക്കാരുടെ ചെലവിലാണ് പോലീസ് ഉദ്യോഗസ്ഥര്‍ ഡല്‍ഹിക്ക് പോയത്. പരാതിക്കാര്‍ തന്നെ വാഗ്ദാനം ചെയ്തതിന്റെ പേരിലായിരുന്നു ഇതെന്നായിരുന്നു ആദ്യം പറഞ്ഞിരുന്നത്. എന്നാല്‍, പോലീസ് ഉദ്യോഗസ്ഥര്‍ ആവശ്യപ്പെട്ട പ്രകാരമാണ് ടിക്കറ്റ് എടുത്ത് നല്‍കിയതെന്നാണ് കമ്മിഷണറുടെ റിപ്പോര്‍ട്ടിലുള്ളത്. ഡല്‍ഹിക്ക് പോകാനായി പോലീസ് ഉദ്യോഗസ്ഥര്‍ക്ക് അഡ്വാന്‍സ് നല്‍കിയതായോ ട്രെയിനില്‍ പോകാന്‍ വാറന്റ് അനുവദിച്ചതായോ റിപ്പോര്‍ട്ടില്‍ ഇല്ല. ക്രിമിനല്‍ കേസെടുക്കാനാകുമോ എന്നത് കോടതി പരിശോധിക്കുന്നത് ഉദ്യോഗസ്ഥര്‍ക്കെതിരേ നിയമപരമായ അച്ചടക്ക നടപടി സ്വീകരിക്കുന്നതിന് തടസ്സമല്ലെന്നും കോടതി വ്യക്തമാക്കി.കോടതിയുടെ ഇടപെടലിനെ തുടര്‍ന്ന് ഷെല്‍റ്റര്‍ ഹോമില്‍നിന്ന് വീട്ടിലേക്കു വിട്ട പെണ്‍കുട്ടികള്‍ പഠനം പുനരാരംഭിച്ചതായി കേരള ലീഗല്‍ സര്‍വീസ് അതോറിറ്റിയുടെ അഭിഭാഷകന്‍ അറിയിച്ചു. ജാമ്യത്തിലിറങ്ങിയ ആണ്‍കുട്ടികള്‍ ഇപ്പോള്‍ ചങ്ങനാശ്ശേരിയിലാണ്. ഇവരുടെ ജാമ്യ വ്യവസ്ഥകളില്‍ ഇളവിനായി ഇതുവരെ കോടതിയില്‍ അപേക്ഷ നല്‍കിയിട്ടില്ല.പെണ്‍കുട്ടികള്‍ സാമൂഹിക മാധ്യമങ്ങളിലൂടെ പരിചയപ്പെട്ട ആണ്‍ സുഹൃത്തിനെ കാണാനാണ് ഡല്‍ഹിക്ക് പോയത്. തുടര്‍ന്നാണ് മാതാപിതാക്കള്‍ പോലീസിനെ സമീപിക്കുന്നത്. ആരോപണ വിധേയനായ എ.എസ്.ഐ. വിനോദ് കൃഷ്ണ ഇപ്പോള്‍ സസ്‌പെന്‍ഷനിലാണ്.