ശബരിമലയിലെ തീര്‍ത്ഥാടന നിയന്ത്രണങ്ങളില്‍ കൂടുതല്‍ ഇളവുകള്‍; പമ്പ സ്നാനത്തിനും ബലതര്‍പ്പണത്തിനും അനുമതി

ശബരിമലയിലെ തീര്‍ത്ഥാടന നിയന്ത്രണങ്ങളില്‍ കൂടുതല്‍ ഇളവുകള്‍. കൊവിഡ് സാഹചര്യം കുറഞ്ഞു വരുന്ന സാഹചര്യത്തിലാണ് നടപടി. മുഖ്യമന്ത്രിയുമായി ദേവസ്വം മന്ത്രി നടത്തിയ ചര്‍ച്ചയിലാണ് തീരുമാനം. പമ്പ സ്നാനം നടത്തുന്നതിനും ബലതര്‍പ്പണത്തിനും അനുമതി. മഴയുണ്ടായാല്‍ പമ്പയിലെ ജലനിരപ്പ് വിലയിരുത്തി ജില്ലാ ഭരണകൂടം തീരുമാനമെടുക്കും.സന്നിധാനത്ത് രാത്രി തങ്ങാന്‍ അനുമതി നല്‍കി. ഇതിനായി 500 മുറികള്‍ സജ്ജമാക്കി. നീലിമലയിലും അപ്പാച്ചിമേട്ടിലും കൂടുതല്‍ പ്രാഥമിക ചികിത്സാ സൗകര്യങ്ങള്‍ സജ്ജമാക്കി. കൂടാതെ ശബരിമല തീര്‍ത്ഥാടകര്‍ക്ക് പമ്പാ സ്‌നാനത്തിനുള്ള ഒരുക്കങ്ങള്‍ പൂര്‍ത്തിയായി. ദേവസ്വം ബോര്‍ഡ് സര്‍ക്കാരിനോടാവശ്യപ്പെട്ട ഇളവുകളില്‍ പ്രധാനമാണ് പമ്പാ സ്‌നാനം. ത്രിവേണി മുതല്‍ ആറാട്ട് കടവ് വരെ നാല് സ്ഥലങ്ങളിലാണ് പമ്പയില്‍ തീര്‍ത്ഥാടകര്‍ക്ക് കുളിക്കുന്നതിന് വേണ്ടി സൗകര്യങ്ങള്‍ ഒരുക്കിയിട്ടുള്ളത്. തീര്‍ത്ഥാടകര്‍ ഒഴുക്കില്‍ പെടാതിരിക്കാന്‍ പ്രത്യേക സുരക്ഷ വേലിയും സ്ഥാപിച്ചിട്ടുണ്ട്. പൊലീസ് ഉദ്യോഗസ്ഥരും റവന്യു ഉദ്യോഗസ്ഥരും സുരക്ഷ പരിശോധന നടത്തി സര്‍ക്കാരിന് റിപ്പോര്‍ട്ട് നല്‍കി. കഴിഞ്ഞ ഒരാഴ്ച്ച ആയി തിര്‍ത്ഥാടകരുടെ എണ്ണം വര്‍ധിച്ചു വരികയാണ്.