‘എയര്‍ ആംബുലന്‍സ് വൈകി’; രോഗിയെ ലക്ഷദ്വീപില്‍ നിന്ന് കൊച്ചിയിലേക്ക് മാറ്റാന്‍ താമസമെന്ന് പരാതി

ലക്ഷദ്വീപില്‍ ഗുരുതരാവസ്ഥയിലുള്ള രോഗിയെ കൊച്ചിയിലെ (kochi) ആശുപത്രിയിലേക്ക് മാറ്റാന്‍ വൈകുന്നതായി പരാതി. അഗത്തി സ്വദേശിയായ 54 കാരന്‍ ജമാലുദ്ദീന്‍ തലയോട്ടിയില്‍ രക്തം കട്ടപിടിക്കുന്ന അസുഖത്തെ തുടര്‍ന്ന് ഗുരുതരാവസ്ഥയിലാണ്. എന്നാല്‍ പ്രത്യേക എയര്‍ ആംബുലന്‍സ് എത്താന്‍ വൈകിയെന്നാണ് ബന്ധുക്കളുടെ പരാതി. തലയോട്ടിയില്‍ രക്തം കട്ടപിടിച്ച് ഗുരുതരാവസ്ഥയില്‍ ഉള്ള ജമാലുദ്ദീന്‍ അഗത്തി രാജീവ്ഗാന്ധി ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലാണ്. ജീവന്‍ രക്ഷിക്കാന്‍ കൊച്ചിയില്‍ എത്തിച്ച് മികച്ച ചികിത്സ കിട്ടേണ്ടതുണ്ടെന്ന ഡോക്ടര്‍മാരുടെ നിര്‍ദ്ദേശത്തെ തുടര്‍ന്നാണ് ജമാലുദ്ദീനെ കേരളത്തിലേക്ക് എത്തിക്കാനുള്ള നീക്കം ബന്ധുക്കള്‍ തുടങ്ങിയത്. എന്നാല്‍ മോശം കാലാവസ്ഥയാണെന്ന കാരണം പറഞ്ഞ് കഴിഞ്ഞ ദിവസം ഹെലികോപ്ടര്‍ എത്തിച്ചില്ലെന്ന് ബന്ധുക്കള്‍ പറയുന്നു. ഇന്ന് ആബുലന്‍സ് എത്തിയെങ്കിലും സമയം വൈകിയതിനാല്‍ നാളെയേ പോകാനാവു എന്ന് അധികൃതര്‍ അറിയിക്കുകയും ചെയ്തു. ലക്ഷദ്വീപ് അഡ്മിനിസ്‌ട്രേറ്റര്‍ കവരത്തി ദ്വീപ് സന്ദര്‍ശനത്തിന് പോയതിനാലാണ് ഇന്ന് ഹെലികോപ്ടര്‍ വൈകിയതെന്ന് ലക്ഷദ്വീപ് എംപി പറഞ്ഞു. സാധാരണ ഗുരുതരാവസ്ഥയിലുള്ള രോഗികള്‍ ഉണ്ടെങ്കില്‍ അഡ്മിനിസ്‌ട്രേറ്റര്‍മാര്‍ മറ്റെല്ലാം മാറ്റിവച്ച് രോഗികളെ കൊണ്ട് പോകാനാവശ്യമായ സഹായം ചെയ്യണമെന്നും എംപി പറഞ്ഞു. എത്രയും പെട്ടെന്ന് ജമാലുദ്ദീനെ കേരളത്തിലെത്തിക്കാന്‍ ആവശ്യമായ കാര്യങ്ങള്‍ ചെയ്യണമെന്നാണ് ബന്ധുക്കളുടെ ആവശ്യം.