മമ്മൂട്ടിയും മോഹന്‍ലാലും ഒന്നിക്കുന്ന ചിത്രമെന്ന്? രാജമൗലിയുടെ മറുപടി

ബിഗ് സ്‌ക്രീനില്‍ ദൃശ്യവിസ്മയം തീര്‍ക്കുന്ന എസ് എസ് രാജമൗലിയുടെ ഫ്രേമുകളില്‍ ഇനി മമ്മൂട്ടിയും മോഹന്‍ലാലും ഒരുമിച്ചെത്തുമോ?ആര്‍ആര്‍ആറിന്റെ റിലീസുമായി ബന്ധപ്പെട്ട് നടന്ന പ്രസ് മീറ്റില്‍ രാജമൗലിയുടെ പ്രതികരണം ഇപ്പോള്‍ ഏറെ ശ്രദ്ധേയമാകുകയാണ്. മോഹന്‍ലാലിനെയും മമ്മൂട്ടിയെയും വച്ച് സിനിമ ചെയ്യുമോ ? എന്ന ചോദ്യത്തിന് രാജമൗലിയുടെ മറുപടി ഇങ്ങനെയായിരുന്നു.''തന്റെ സിനിമയ്ക്ക് കഥാപാത്രങ്ങളാണ് പ്രാധാന്യം. കഥയും കഥാപാത്രവും ആവശ്യപ്പെടുന്നത് അനുസരിച്ചാണ് കഥാപാത്രങ്ങളെ തീരുമാനിക്കുന്നത്. അല്ലാതെ, ഇതൊരു മലയാളി നടനെ വച്ച് ചെയ്യാം തമിഴ് നടനെ വച്ച് ചെയ്യാം എന്ന് ആലോചിച്ചിട്ടില്ല. തീര്‍ച്ചയായും മമ്മൂട്ടി സാറിനെയും മോഹന്‍ലാല്‍ സാറിനെയും വച്ച് ചെയ്യാന്‍ സാധിക്കും വിധമുള്ള കഥയും കഥാപാത്രവും വന്നാല്‍ അങ്ങനെ ഒരു സിനിമ ഉണ്ടാവും''. ഇന്ത്യന്‍ സിനിമയില്‍ ഏറ്റവും കൂടുതല്‍ ചര്‍ച്ച ചെയ്യപ്പെടുന്ന സംവിധായകാരില്‍ എസ് എസ് രാജമൗലി പ്രധാന ഇടം നേടുന്നുണ്ട്. മാത്രമല്ല രാജമൗലിയുടെ സംവിധാനത്തില്‍ മികച്ച അഭിനയം കാഴ്ച്ചവെക്കാനായി നിരവധി പേരാണ് കാത്തിരിക്കുന്നത്. ഇപ്പോള്‍ അദ്ദേഹത്തിന്റെ 'ആര്‍ആര്‍ആര്‍' എന്ന ചിത്രത്തിനായുള്ള കാത്തിരിപ്പിലാണ് പ്രേക്ഷകര്‍. രാംചരണ്‍, ജൂനിയര്‍ എന്‍.ടി.ആറും പ്രധാന വേഷത്തില്‍ എത്തുന്ന ചിത്രത്തിലെ നായിക ബോളിവുഡ് താരം ആലിയ ഭട്ടാണ്. 2022 ജനുവരി ഏഴിനാണ് ചിത്രം റിലീസ് ചെയ്യുക. കഴിഞ്ഞ ഒരു പതിറ്റാണ്ടു കാലമായി മലയാള സിനിമ പലരും റഫര്‍ ചെയ്യുന്നുണ്ടെന്നും രാജമൗലി പറയുന്നു. മലയാള സിനിമ ഇപ്പോഴല്ല ശ്രദ്ധിയ്ക്കപ്പെട്ടത്. എന്നാല്‍ കൂടുതല്‍ ആളുകള്‍ മലയാള സിനിമ ഒടിടിയിലൂടെ കണ്ടത് ഈ ലോക്ക് ഡൗണ്‍ സമയത്ത് ആണെന്ന് മാത്രമാണെന്നും അദ്ദേഹം കൂട്ടിച്ചേര്‍ത്തു. ഏതായാലും മലയാളി പ്രേക്ഷകര്‍ക്ക് ഏറെ പ്രതീക്ഷ നല്‍കുന്ന വാക്കുകളാണ് എസ് എസ് രാജമൗലി അറിയിച്ചിരിക്കുന്നത്.