കേരളത്തില്‍ 4 പേര്‍ക്കുകൂടി ഒമിക്രോണ്‍;2 പേര്‍ ആദ്യ കേസിലെ സമ്പര്‍ക്കപ്പട്ടികയില്‍ ഉള്ളവര്‍

കേരളത്തില്‍ നാലുപേര്‍ക്കു കൂടി ഒമിക്രോണ്‍ സ്ഥിരീകരിച്ചു. രണ്ടുപേര്‍ ആദ്യ കേസിലെ സമ്പര്‍ക്കപ്പട്ടികയില്‍ ഉള്ളവരാണ്. രോഗം സ്ഥിരീകരിച്ചയാളുടെ ഭാര്യയും ഭാര്യമാതാവുമാണിവര്‍. മറ്റു രണ്ടുപേരില്‍ ഒരാള്‍ കോംഗോയില്‍ നിന്നെത്തിയ എറണാകുളം സ്വദേശിയും, മറ്റൊരാള്‍ യുകെയില്‍നിന്നെത്തിയ തിരുവനന്തപുരം സ്വദേശിനിയുമാണ്. ഇതോടെ, സംസ്ഥാനത്ത് ഒമിക്രോണ്‍ ബാധിച്ചവരുടെ എണ്ണം അഞ്ച് ആയി. പുതിയ ഒമിക്രോണ്‍ കേസുകള്‍ സാഹചര്യത്തില്‍ ജാഗ്രത അനിവാര്യമാണെന്ന് ആരോഗ്യമന്ത്രി വീണാ ജോര്‍ജ് അറിയിച്ചു. യുകെയില്‍ നിന്നുവന്ന എറണാകുളം സ്വദേശിക്കാണ് ഒമിക്രോണ്‍ ആദ്യമായി കണ്ടെത്തിയത്. തിരുവനന്തപുരം രാജീവ് ഗാന്ധി ബയോടെക്‌നോളജി സെന്ററിലും ഡല്‍ഹിയിലും നടത്തിയ സാംപിള്‍ പരിശോധനയിലാണ് അദ്ദേഹത്തിന് ഒമിക്രോണ്‍ സ്ഥിരീകരിച്ചത്. രോഗം സ്ഥിരീകരിച്ചയാള്‍ യുകെയില്‍നിന്ന് അബുദാബിയില്‍ എത്തിയ ശേഷം ഡിസംബര്‍ ആറാം തീയതിയാണ് കൊച്ചിയില്‍ എത്തിയത്. ആദ്യം നടത്തിയ പരിശോധനയില്‍ നെഗറ്റീവായിരുന്നെങ്കിലും എട്ടാം തീയതി നടത്തിയ ടെസ്റ്റില്‍ പോസിറ്റീവാവുകയായിരുന്നു.