അഭയ കൊലക്കേസ്; ഫാ. തോമസ് കോട്ടൂരിനെ ജയില്‍ മോചിതനാക്കരുതെന്ന് പൊലീസ് റിപ്പോര്‍ട്ട്

സിസ്റ്റര്‍ അഭയ കൊലക്കേസിലെ പ്രതി ഫാ. തോമസ് കോട്ടൂരിനെ ജയില്‍ മോചിതനാക്കരുതെന്ന് പൊലീസ് റിപ്പോര്‍ട്ട്. കോട്ടയം എസ്പിയാണ് ജയില്‍ വകുപ്പിന് റിപ്പോര്‍ട്ട് നല്‍കിയത്. 70 വയസ് കഴിഞ്ഞ തടവുകാരെ ജയില്‍ മോചിതരാക്കുന്നതിന്റെ ഭാഗമായി തയ്യാറാക്കിയ പട്ടികയില്‍ ഫാ. തോമസ് കോട്ടൂരും ഉള്‍പ്പെടുന്നുണ്ട്. ഇതേ തുടര്‍ന്നാണ് ജയില്‍ വകുപ്പ് പൊലീസിനോട് റിപ്പോര്‍ട്ട് ആവശ്യപ്പെട്ടത്. ഏറെ വിവാദമായ കേസില്‍ ഇരട്ട ജീവപര്യന്തം ലഭിച്ച പ്രതിയെ ഇത്രയും പെട്ടെന്ന് ജയില്‍ മോചിതനാക്കുന്നത് തെറ്റായ സന്ദേശം നല്‍കുമെന്നാണ് പൊലീസ് ജയില്‍ വകുപ്പിന് റിപ്പോര്‍ട്ട് നല്‍കിയത്. റിപ്പോര്‍ട്ട് ജയില്‍ വകുപ്പ് സര്‍ക്കാരിന് കൈമാറി. പൂജപ്പുര സെന്‍ട്രല്‍ ജയില്‍ സൂപ്രണ്ടിനാണ് റിപ്പോര്‍ട്ട് നല്‍കിയത്. ഫാ. തോമസ് കോട്ടൂരിന്റെ വിടുതല്‍ കാര്യത്തില്‍ സര്‍ക്കാരാണ് ഇനി തീരുമാനമെടുക്കേണ്ടത്. കേസിലെ ഒന്നാം പ്രതിയായ തോമസ് കോട്ടൂരിന് കൊവിഡ് വ്യാപന സമയത്ത് 139 ദിവസം പരോള്‍ നല്‍കിയിരുന്നു. ഫാ. തോമസ് കോട്ടൂരിനെ വിട്ടയക്കരുതെന്നാവശ്യപ്പെട്ട് അഭയ ആക്ഷന്‍ കൗണ്‍സില്‍ കണ്‍വീനര്‍ ജോമോന്‍ പുത്തന്‍പുരയ്ക്കല്‍ മുഖ്യമന്ത്രിക്ക് നിവേദനം നല്‍കി.